Qanat Bozymbaev óńirlik damý máseleleri boıynsha Jobalyq ofıs otyrysyn ótkizdi
ASTANA. KAZINFORM – Kún tártibinde «Aýyl amanaty» jobasyn iske asyrý barysy men aýyldyq eldi mekenderge júrgizilgen skrınıng nátıjeleri qaraldy. Bul týraly Úkimettiń baspasóz qyzmeti habarlady.
Skrınıng 220 aýyldyq eldi mekendi qamtydy. Jumys «Aýyl amanaty» jobasy aıasynda Ulttyq ekonomıka mınıstrligi, oblys ákimdikteri jáne «Amanat» partııasymen birlesip júrgizildi.
Maqsat – bolashaǵy bar ınvestıtsııalyq jobalardy irikteý jáne oblystyq mańyzy bar aýdandar men qalalardyń damý josparlaryn naqtylaý.
Barlyǵy 55 mlrd teńge kólemindegi 6 myńnan astam joba óńirlik damý basymdyqtaryna basa nazar aýdaryldy. Qazirgi ýaqytta aýyldyq ınvestıtsııalyq jobalardy baǵalaýdyń biryńǵaı ádistemesi ázirlenip jatyr. Ol ınfraqurylym, demografııa, jumyspen qamtý qurylymy men resýrs bazasyn eskere otyryp, jobalardyń tıimdiligin ádil baǵalaýǵa jáne tabysty tájirıbelerdi el boıynsha keńinen engizýge múmkindik beredi.
Qanat Bozymbaev 15 mamyrǵa deıin ádistemeni ázirleýdi, al 15 maýsymǵa deıin oblystyq mańyzy bar qalalar men árbir aýdannyń bes jyldyq damý josparlaryn maslıhattarda bekitýdi tapsyrdy. Bul qujattar kelisilgen tásilder men áleýmettik ınfraqurylymdy eskere otyryp daıyndalýy tıis.
«Oblys ákimdikteri «Aýyl amanaty» jobalaryn skrınıngpen aıqyndalǵan basym baǵyttarǵa sáıkestendirý jumysyn 25 sáýirge deıin aıaqtaýy qajet», — dedi vıtse-premer.
Otyrysta aýyldyq jerlerde shaǵyn ónerkásiptik aımaqtar (ShÓA) qurý máselesine de erekshe nazar aýdaryldy. Qazirdiń ózinde keıbir óńirlerde, mysaly, Túrkistan oblysynda bul jobalar iske qosyla bastady.
Vıtse-premer oblys ákimdikterine jáne «Ónerkásipti damytý qory» AQ-ǵa Qostanaı, Pavlodar, Jambyl, Batys Qazaqstan, Qyzylorda, Almaty, Aqmola jáne Túrkistan oblystarynda 10 pılottyq ShÓA jobasyn iske qosýdy mamyr aıynyń sońyna deıin bastaý jóninde tapsyrma berdi.
Sondaı-aq Shyǵys Qazaqstan, Qyzylorda, Túrkistan oblystary men Qonaev qalasynyń ákimdikteri «Aýyl amanaty» baǵdarlamasyn iske asyrý boıynsha óz usynystaryn tanystyrdy. Nátıjesinde vıtse-premer Ulttyq ekonomıka mınıstrligine aýyldyq eldi mekender men shaǵyn qalalarda mıkrokredıt berý men lızıng erejelerin 10 mamyrǵa deıin bekitýdi tapsyrdy. Jobalyq ofıs jumysty óńirlerge shyǵyp, jergilikti ákimdikterdiń atqarǵan jumystaryn tyńdaý arqyly jalǵastyrady.
Aıta ketelik jyl basynan beri óńdeý ónerkásibi óndirisiniń kólemi 8,7%-ǵa ósken edi.