Qanat Bozymbaev kommýnaldyq sektordy jańǵyrtý jobalaryn jedeldetýdi tapsyrdy
ASTANA. KAZINFORM – Premer-mınıstrdiń orynbasary Qanat Bozymbaev Energetıka jáne kommýnaldyq sektordy jańǵyrtý jónindegi ulttyq jobanyń júzege asyrylý barysyn, jobalardy qarjylandyrý máselelerin, otandyq taýar óndirýshiler ónimderin qoldaný deńgeıin, sondaı-aq turǵyn úı kómegin proaktıvti formatta kórsetý jumystaryn tekserdi. Bul týraly Úkimettiń baspasóz qyzmeti habarlady.
Ulttyq jobanyń elektrondyq platformasynda jalpy quny shamamen 1,4 trln teńgeni quraıtyn 520 joba tirkelgen. Onyń ishinde 554 mlrd teńge somasyndaǵy 244 joba satyp alý rásimderiniń túrli kezeńderinde tur. Ulttyq ekonomıka mınıstrliginiń málimetinshe, pılottyq jobalardy eskere otyryp, jalpy quny 371 mlrd teńgeden asatyn 127 joba boıynsha konkýrstyq rásimder aıaqtalǵan. Qazirgi ýaqytta jobalaý jáne qurylys-montaj jumystary júrgizilýde.
Nátıjesinde bıyl «qyzyl aımaqtaǵy» nysandar sanyn, sondaı-aq ınjenerlik jelilerdiń synı tozý deńgeıin tómendetý kútilýde:
- jylýmen jabdyqtaý salasynda — Pavlodar, Soltústik Qazaqstan, Mańǵystaý, Qaraǵandy jáne Aqmola oblystarynda;
- elektrmen jabdyqtaý salasynda — Jambyl, Batys Qazaqstan, Soltústik Qazaqstan, Qaraǵandy oblystarynda, Abaı oblysy men Almaty qalasynda;
- sýmen jabdyqtaý salasynda — Jetisý, Túrkistan, Almaty, Jambyl jáne Qaraǵandy oblystarynda;
- sý burý salasynda — Jetisý, Qaraǵandy, Batys Qazaqstan, Almaty, Túrkistan jáne Aqtóbe oblystarynda, sondaı-aq Shymkent qalasynda.
Qanat Bozymbaev ákimdikterge Ónerkásip jáne qurylys mınıstrligimen, Ulttyq ekonomıka mınıstrligimen jáne «QazOrtalyq TKSh» AQ-men birlesip jobalardy júzege asyrý qarqynyn jedeldetýdi jáne óńirlerde jóndeý jumystaryna dereý kirisýdi tapsyrdy.
Sondaı-aq 2026 jylǵy 1 maýsymǵa deıin EKSJ elektrondyq platformasy arqyly 2027 jylǵa arnalǵan barlyq joba boıynsha ótinimderdi engizýdi qamtamasyz etý tapsyryldy.
Vıtse-premer EKSJ aıasyndaǵy jobalardyń eleýli bóligi kvazımemlekettik jáne jekemenshik sektordyń iri kompanııalaryna tıesili ekenin atap ótti. Osyǵan baılanysty «Báıterek» holdıngine Ulttyq ekonomıka mınıstrligimen birlesip ekinshi deńgeıli bankter men halyqaralyq qarjy uıymdary arqyly qarjy tartatyn jeke kompanııalardy súıemeldeýdi kúsheıtý tapsyryldy. Budan bólek, vıtse-premer Biryńǵaı jınaqtaýshy zeınetaqy qorynyń qarajatyn tartý máselesin pysyqtap, 2026 jylǵy 1 maýsymǵa deıin Úkimet apparatyna usynystar engizýdi tapsyrdy.
Otyrysta EKSJ jobalary sheńberindegi satyp alý rásimderiniń júıeli máseleleri men otandyq taýar óndirýshilerge basymdyq berý máselesine erekshe nazar aýdaryldy.
Ónerkásip jáne qurylys mınıstrligine «QazOrtalyq TKSh» AQ jáne Tabıǵı monopolııalardy retteý komıtetimen birlesip bir apta ishinde barlyq jobalarǵa taldaý júrgizip, qazaqstandyq óndiris taýarlaryn barynsha paıdalanýdy qamtamasyz etý tapsyryldy.
Sonymen qatar tabıǵı monopolııa sýbektileri men EPC-merdigerler tarapynan otandyq óndirýshiler ónimderin satyp alý boıynsha turaqty monıtorıng júrgizý júkteldi.
— Biz qazaqstandyq taýarlardy jobalaý kezeńinen bastap qoldanýdy qamtamasyz etýimiz qajet. Sonymen qatar ónimdi qajetti kólemde, sapada jáne merziminde jetkizý máseleleri boıynsha otandyq óndirýshilermen ózara is-qımyldy jolǵa qoıý mańyzdy, — dedi Qanat Bozymbaev.
Kún tártibindegi taǵy bir mańyzdy másele — BJO operatorlarymen ıntegratsııalaý arqyly turǵyn úı kómegin esepteý men taǵaıyndaý úderisterin avtomattandyrý boldy.
Eńbek jáne halyqty áleýmettik qorǵaý mınıstrligi tarapynan servısterdiń tolyq tehnıkalyq jáne uıymdastyrýshylyq daıyndyǵy qamtamasyz etilgeni atap ótildi. Ónerkásip jáne qurylys mınıstrligi aqparattyq qaýipsizdik talaptaryna sáıkestik attestatynan ótken 12 BEAO operatoryn «Áleýmettik kómek» AJ-men ıntegratsııalaý jumystaryn júrgizýde.
Otyrys qorytyndysy boıynsha Qanat Bozymbaev Eńbek jáne halyqty áleýmettik qorǵaý mınıstrligine Ónerkásip jáne qurylys mınıstrligimen jáne ákimdiktermen birlesip 2026 jylǵy 1 shildege deıin BJO-men tolyq ıntegratsııany aıaqtaýdy tapsyrdy.
Aıta ketelik Úkimette ónerkásip, energetıka jáne kólik salalaryn damytý máseleleri qaralǵan edi.
