Qanat Bozymbaev Qyzylorda oblysynyń agrarshylarymen kezdesti
ASTANA. KAZINFORM – Premer-mınıstr Oljas Bektenovpen birlesken jumys sapary aıasynda Premer-mınıstrdiń orynbasary Qanat Bozymbaev Túrkistan jáne Qyzylorda oblystaryndaǵy sý sharýashylyǵy nysandaryn tekserýdi jalǵastyryp, jergilikti agrarshylarmen birneshe kezdesý ótkizdi.
Qyzylorda oblysynyń ákimi Nurlybek Nálibaevpen birge Syrdarııa, Qazaly, Qarmaqshy jáne Jalaǵash aýdandaryndaǵy sharýa qojalyqtaryna baryp, aýyl sharýashylyǵy salasynyń qazirgi ahýalymen tanysty.
Qanat Bozymbaev Syrdarııa aýdanyndaǵy kúrish, bıdaı jáne jońyshqa ósirýmen aınalysatynyn «Maǵjan ı K» sharýashylyǵyna bardy. Munda sýarmaly sýdy tıimdi paıdalaný jáne sý shyǵynyn azaıtý úshin lazerlik jer tegisteý tehnologııasy engizilgen. Qazirgi tańda aýdanǵa josparlanǵan 674,2 mln tekshe metr sýdyń 458,5 mln tekshe metri nemese 68 %-y jetkizilgen.
Qazaly aýdanynda vıtse-premer «RZA» kompanııasynda boldy. Bul jerde 200-den astam adam jumys isteıdi. Sharýashylyq kúrish, júgeri jáne jońyshqa egedi. Egis «Basyqara» jáne «Qyzyloı» kanaldary arqyly sýarylady. Aýdanda egin sharýashylyǵymen aınalysatyn 9 kásiporyn bar. Vegetatsııalyq kezeń bastalǵaly beri kelisimsharttarda kózdelgen 295,03 mln tekshe metr sýdyń 259,6 mln tekshe metri nemese 88 %-y jetkizilgen. Sharýashylyqtarǵa Tótenshe jaǵdaılar mınıstrligi sorǵy qondyrǵylaryn alyp berip, qosymsha qoldaý kórsetip otyr.
Odan keıin Premer-mınıstrdiń orynbasary «Basyqara» sý torabynyń jumysymen tanysyp, sharýashylyq basshylarymen kezdesýde halyqaralyq kelisimder jóninde aqparat berdi.
– Kórshi eldermen júrgizilgen kelissózderdiń nátıjesinde, vegetatsııalyq kezeńdi sátti aıaqtaý úshin sý kólemi jetkilikti bolady dep kútilip otyr. 15 tamyzǵa deıin Ózbekstannan sekýndyna 200 tekshe metr, Qyrǵyzstannan 150 tekshe metr sý jetkiziledi, - dedi Q.Bozymbaev.
Sondaı-aq vıtse-premer Qarmaqshy jáne Jalaǵash aýdandaryndaǵy sýarmaly jerlerdiń jaı-kúıimen tanysyp, «Jańajol» jáne «Tań LTD» kásiporyndaryn aralady.
Ár aýdanda fermerler arasynda monıtorıng jáne túsindirý jumystaryn júrgizý úshin jumys toptary qurylǵan. Aımaqta sýdy tıimdi paıdalaný maqsatynda 320-dan astam sorǵy qondyrǵysy iske qosylǵan. Egistiktiń 98%-y 5 magıstraldyq jáne 3 sharýashylyqaralyq kanal arqyly kestege sáıkes sýarylyp jatyr. Jaǵdaı Úkimettiń turaqty baqylaýynda bolady.
Buǵan deıin Úkimet basshysynyń Qyzylordada sý únemdeý tehnologııalaryn engizý barysyn teksergenin jazǵan edik.