Qanat Bozymbaev qaıyrymdylyq kómek bólýge qoǵamdyq uıymdardy tartýdy tapsyrdy
ASTANA. KAZINFORM — Vıtse-premer, Sý tasqynyna qarsy is-sharalardy úılestirý jáne sý tasqyny saldaryn joıý jónindegi respýblıkalyq shtab meńgerýshisiniń orynbasary Qanat Bozymbaev sý tasqynynan zardap shekkenderge qaıyrymdylyq kómek bólýge qoǵamdyq uıymdardy tartýdy tapsyrdy.
Onyń aıtýynsha, sý tasqyny aımaǵyndaǵy 100 myńǵa jýyq adam úılerinen qaýipsiz jerge kóshirildi. Júzdegen evakýatsııalaý pýnktteri qurylyp, onyń árqaısysy qajetti zattarmen qamtamasyz etilgen. Onda dárigerler, sanıtarlyq-epıdemıologııalyq qyzmetter kezekshilik etip jatyr.
Osy qıyn sátte myńdaǵan qazaqstandyq zardap shekken óńirlerge kómek qolyn sozdy. Gýmanıtarlyq júkterdi jınaý árbir qalada júrgiziledi. Sonymen birge áleýmettik jelilerde zardap shekkenderge kómektesý úshin qarajat jınaý týraly kóptegen habarlandyrýlar paıda boldy. Ońaı jolmen paıda tabýdy kózdegenderdiń qurbanyna aınalýdan qalaı saqtanýǵa bolady?
Resmı túrde jumys isteıtin jáne ákimdikter de, jergilikti belsendiler qaýymdastyǵy da baqylaıtyn aımaqtyq qaıyrymdylyq qorlary bar. Respýblıkalyq deńgeıde Qazaqstanda 2 qor bar – olar «Demeý Qazaqstan qory» korporatıvtik qory jáne «Qazaqstan halqyna» qory.
Vıtse-premer, Sý tasqynyna qarsy is-sharalardy úılestirý jáne sý tasqynynyń saldaryn joıý jónindegi respýblıkalyq shtab meńgerýshisiniń orynbasary Qanat Bozymbaev «Qazaqstan halqyna» qory atalǵan óńirlerde zardap shekken turǵyndarǵa arnap 400-500 úı salýǵa daıyn ekenin aıtty.
Óńirlerge shetelden nemese iri kompanııalardan kelgen barlyq gýmanıtarlyq kómekti Tótenshe jaǵdaılar mınıstrligi úılestiredi jáne ol qoǵamdyq baqylaýda bolýǵa tıis.
