Qanat Bozymbaev Qaraǵandy oblysynyń sý tasqyny kezeńine daıyndyǵyn tekserdi
ASTANA. KAZINFORM – Qaraǵandy oblysynda eldi mekenderdi sý tasqynynan qorǵaý úshin 180-ge jýyq is-shara oryndaldy. 1 naýryzdan bastap jaǵdaıdy baqylaý úshin joǵary daıyndyq rejımi engiziledi.
Jumys sapary aıasynda premer-mınıstrdiń orynbasary Qanat Bozymbaev oblys ákimi Ermaǵanbet Bólekpaevpen, TJ mınıstri Shyńǵys Arynovpen jáne óńirdiń TJD bastyǵy Marǵulan Amanbaevpen birge óńirdiń sý tasqyny qaýipti ýchaskelerin aralap shyqty. Buqar jyraý, Shet jáne Abaı aýdandarynyń eldi mekenderi, Nura jáne Sherýbaı-Nura ózenderiniń arnalary, Samarqand jáne Sherýbaı-Nura sý qoımalary tekserildi.
Jumys saparynyń maqsaty – Memleket basshysynyń sý tasqyny qaýpi bar kezeńge daıyndyq jumystaryn úılestirý boıynsha bergen tapsyrmalarynyń oryndalýyn baqylaý.
Oblysta 150 eldi meken erekshe baqylaýǵa alyndy. Sonymen qatar, 140-qa jýyq avtomobıl jáne temir jol ýchaskeleri nazarda. Óńirde 217 sý sharýashylyǵy qurylystary bar. Óńir boıynsha jaǵdaı turaqty, ózender qysqy rejımde, sýdyń deńgeıi tómen jáne sýdyń az bolýy baıqalady.
Vıtse-premerge óńirde sý tasqynyna daıyndyq jumystary aldyn ala bastalǵany habarlandy.
TJD málimetinshe, oblystyq ınjenerlik jumystar jospary aıasynda 180-ge jýyq is-shara oryndaldy. 65 km qorǵanys bógetteri men bilikteri salyndy jáne bekitildi, ózen arnalarynyń 18 km-den astam sý tasqyny qaýipti ýchaskelerine sanatsııa júrgizildi, 26 km drenaj jáne sý burý júıeleri tazartyldy. Avtomobıl joldarynyń 75 ýchaskesinde sý ótkizý qabileti ulǵaıdy. JJM, ınertti materıal jáne qaptar qory qamtamasyz etilgen.
Eldi mekenderden mıllıon tekshe metrden astam qar shyǵaryldy, jumystar jalǵasýda. Sondaı-aq, sý burý orlaryn jasaý, kanaldar men aryqtardy, sý ótkizý qubyrlaryn tazartý jumystary júrgizilýde.
Vıtse-premer ótken jyly 60 úıdi sý basqan Shet aýdanynda sý tasqynyna qarsy is-sharalardy júrgizýge nazar aýdardy. Ushý kezinde Aqsý aýylyna qoný boldy. Bul jerde uzyndyǵy 2,3 km bolatyn qorǵanys biligi turǵyzyldy. Aýdan ákimi Muhıt Muhtarov júrgizilgen jumystar týraly baıandady: qorǵanys bilikteri bekitilgen, qosymsha sý ótkizý qubyrlary salynyp, sý ótkizý qurylystary tazartyldy.
– Qazgıdromettiń boljamynsha, kóktemle aýa raıynyń kúrt jylynýy kútilýde. Biz TJ mınıstrimen birge sý tasqyny qaýpi bar aımaqtardy aınalyp ushyp ótýdi bastaımyz. Búgin Qaraǵandy oblysynan bastadyq. Sý tasqynyna ushyraǵan barlyq aýmaqty aınalyp ótip, birqatar eldi mekenderdi araladyq. Buqar jyraý jáne Qarqaraly aýdandarynda qar deńgeıi normadan joǵary. Shet aýdanyna kelsek, qar normadan tómen, ylǵal qory da qalypty deńgeıde. Topyraqtyń qatýy ótken jylmen salystyrǵanda tómen. Biz úlken jumys atqarylǵanyna kóz jetkizdik. Biraq daıyn bolý kerek: boljam boıynsha alda áli qalyń qar jaýady jáne kún jylynady, – dedi qorytyndylady Qanat Bozymbaev.
Vıtse-premer barlyq kúshterdi, tehnıkany ázirlikke keltirý kerektigin atap ótti. Jaǵdaıdy kún saıyn qadaǵalap otyrý qajet.
Eske salsaq Ulytaýdyń TJ quramy «joǵary daıyndyq» rejımine kóshken edi.