Qanat Bozymbaev «Energetıka jáne kommýnaldyq sektorlardy jańǵyrtý» Ulttyq jobasyn júzege asyrý barysyn tekserdi

ASTANA. KAZINFORM — Premer-mınıstrdiń orynbasary Qanat Bozymbaev osy jyldyń І toqsanynyń qorytyndysy boıynsha Jol kartasynyń aıasyndaǵy is-sharalardy iske asyrý jónindegi Jobalyq ofıs otyrysyn ótkizdi. Bul týraly Úkimettiń baspasóz qyzmeti habarlady. 

Búgingi tańda Ulttyq jobany júzege asyrýǵa baǵyttalǵan zańnamalyq túzetýler Májiliste qaralyp jatyr. Otyrys qatysýshylary norma shyǵarmashylyq qyzmet pen onyń ishinde tabıǵı monopolııalar sýbektileriniń (TMS) zaımdary boıynsha syıaqy mólsherlemeleriniń bir bóligin sýbsıdııalaý qaǵıdalary jobasyn ázirleý barysy týraly esep berdi.

Sonymen qatar ótken toqsanda qarjylyq operator retinde «Báıterek»UBH» AQ-nyń qyzmet reglamenti ázirlendi, salalar men óńirler bólinisinde jelilerdiń tozýyn tómendetý boıynsha taldaý júrgizildi. Bıylǵy jyldan bastap Ulttyq jobaǵa qatysatyn óńirlerdegi pılottyq TMS tizimi anyqtaldy: elektrmen jabdyqtaý salasynda – 18, jylýmen jabdyqtaý salasynda – 19, sýmen jabdyqtaý boıynsha – 24, sý burý boıynsha – 26 kásiporyn.

Merdigerdi ERS-kelisimshart arqyly irikteý mehanızmderi, jumystar men qyzmetterdi satyp alý normalary talqylandy. Konkýrstyq rásimder júrgiziletin biryńǵaı elektrondyq platforma ázirlenýde.

Budan bólek, Ulttyq joba «Samuryq-Qazyna» UÁQ» AQ-nyń 19 jobasyn qamtıdy.

Otyrys qorytyndysy boıynsha Qanat Bozymbaev birqatar memlekettik organǵa bıýrokratııalyq rásimderdi qysqartýdy jáne osy jyldyń jazynda pılottyq jobalardy iske qosý úshin tapsyrmalardy oryndaý qarqynyn arttyrýdy tapsyrdy.

Aıta ketelik Shekarada erte pisetin kókónisterge arnalǵan «jasyl dáliz» ashylady.