Qanat Bozymbaev EKSJ jobalyq keńsesine jańa mindet júktedi
ASTANA.KAZINFORM – Premer-mınıstrdiń orynbasary Qanat Bozymbaev Energetıkalyq jáne kommýnaldyq sektorlardy jańǵyrtý jónindegi ulttyq jobany júzege asyrýǵa arnalǵan jobalyq keńseniń otyrysyn ótkizdi. Bul týraly Úkimettiń baspasóz qyzmeti habarlady.
Bıyl jalpy quny 31,6 mlrd teńge bolatyn jobalar toptamasy júzege asyrý satysynda. Ulttyq jobanyń qarjylyq turaqtylyǵy men aýqymyn keńeıtý úshin qarajat tartýdyń ártaraptandyrylǵan strategııasy ázirlendi.
Ákimdikterdiń oblıgatsııalaryn satyp alý tetigi arqyly «QTK» AQ tarapynan 29,2 mlrd teńge baǵyttalyp, birqatar óńirde 15 pılottyq joba iske qosyldy. Sonymen qatar damý ınstıtýttary men ekinshi deńgeıli bankter arqyly qarjylandyrý pysyqtalyp, naryqtyq qaryz tartý kózdelip otyr.
Energetıkalyq jáne kommýnaldyq resýrstardy esepke alý men monıtorıngteýdiń zamanaýı júıelerin engizý jumystary júrgizilip jatyr. Bul baǵyt 170 tabıǵı monopolııa sýbektisin qamtıdy jáne 2026-2029 jyldarǵa josparlanǵan. Atalǵan kezeńde shamamen 8 mln esepteý quraly ornatylyp, jańartylmaq. Salalyq mınıstrlikterge jyl sońyna deıin kommýnaldyq qyzmetterge arnalǵan esepteý quraldarynyń standarttaryn bekitý tapsyryldy.
Qanat Bozymbaev ulttyq joba aıasynda otandyq taýarlar men qyzmetterdi paıdalanýdy yntalandyrý jáne EPC-merdigerlerdiń daıyndyǵy jónindegi esepti tyńdady. Qazirgi tańda MEKS satyp alý platformasynda 70-ke jýyq áleýetti jetkizýshi tirkelgen. 2026 jylǵa arnalǵan kásiporyndardyń qajettiligi taldanyp, áleýetti jetkizýshiler tizimi qalyptastyryldy. Ol jalpy quny 439 mlrd teńgeden asatyn 11 myńnan astam taýar pozıtsııasyn qamtıdy.
Vıtse-premer Kólik mınıstrligi men Qarjy mınıstrligine otandyq taýar óndirýshiler servısin ulttyq jobanyń meks.zakup.sk.kz elektrondy satyp alý platformasymen yqpaldastyrýdy tapsyrdy. Sondaı-aq salalyq vedomstvolarǵa barlyq EPC-merdigerler men qyzmet kórsetýshi áleýetti jetkizýshilerdiń platformada tirkelýin, ári ulttyq jobaǵa qajetti taýar pozıtsııalary boıynsha OTP tiziliminiń tolyqtyrylýyn qamtamasyz etý júkteldi.
Qanat Bozymbaev áleýmettik baǵytqa da erekshe nazar aýdaryp, ákimdikterge turǵyn úı kómegin kórsetý tetikterin halyqqa keńinen túsindirý jumysyn kúsheıtýdi tapsyrdy. Al Eńbek jáne halyqty áleýmettik qorǵaý mınıstrligine turǵyn úı kómegin alý úderisin tolyq avtomattandyryp, proaktıvti formatta kórsetý úshin óz aqparattyq júıelerin biryńǵaı esep aıyrysý ortalyqtarynyń derekqorymen ıntegratsııalaý mindeti júkteldi.
Buǵan deıin EKSJ ulttyq jobasy aıasynda satyp alýdyń elektrondy platformasy iske qosylǵanyn jazǵan edik.