Qanat Bozymbaev EKSJ boıynsha artta qalǵan jobalardy jedeldetýdi talap etti
ASTANA. KAZINFORM — Úkimette Premer-mınıstrdiń orynbasary Qanat Bozymbaevtyń tóraǵalyǵymen Energetıkalyq jáne kommýnaldyq sektorlardy jańǵyrtý jónindegi ulttyq jobany (EKSJ) júzege asyrý boıynsha Jobalyq keńseniń otyrysy ótti.
Qatysýshylar jobalardy qarjylandyrý, esepke alý quraldaryn ornatý jáne tsıfrlyq sheshimderdi engizý, onyń ishinde sý jabdyqtaý salasyndaǵy pılottyq jobalar týraly baıandady.
Búgingi tańda EKSJ aıasynda rastalǵan jobalardyń jalpy somasy 974 mlrd teńgeni quraıdy. 34 joba júzege asyrylý kezeńinde, 130 joba EPC-merdigerlerdi aıqyndaý satysynda. Taǵy 145 joba irikteýdiń ártúrli kezeńderinen ótýde.
Ulttyq jobany júzege asyrýǵa ákimdikterdi tartý reıtıngi qalyptastyryldy. Oǵan daıyndyǵy boıynsha Almaty qalasy, Qaraǵandy jáne Almaty oblystary kósh bastap tur. Artta qalǵan óńirler qatarynda Mańǵystaý oblysy men Ulytaý oblysy bar.
EKSJ sheńberinde kárizdik-tazartý qurylystaryn salý jáne rekonstrýktsııalaý jumystary jalǵasyp jatyr: 16 joba tolyq júzege asyrýǵa daıyn, taǵy 6 joba pysyqtaý jáne ákimdikter tarapynan túpkilikti sheshim qabyldaý satysynda.
«Báıterek» holdıngi myńnan astam ótinimdi qarady. Ekinshi kezeńde jalpy somasy 300 mlrd teńgeden asatyn 144 joba kelisildi. Onyń ishinde 89-y — Qazaqstannyń Damý banki men ekinshi deńgeıli bankter arqyly tikeleı kredıtteý tetigi boıynsha, 55-i — Qazaqstandyq turǵyn úı kompanııasy arqyly memlekettik baǵaly qaǵazdardy satyp alý tetigi boıynsha maquldandy.
Sý jabdyqtaý salasynda zamanaýı esepke alý júıelerin engizý úshin esepke alý quraldaryna qoıylatyn standarttar ázirlendi. Qujattar Ádilet mınıstrliginde tirkeýden ótip jatyr.
EKSJ elektrondyq satyp alý platformasynyń jumysy boıynsha baılanys ortalyǵy (8 7172 99-94-36) ashyldy. Іske qosylǵan sátten bastap 800-den astam ótinish tirkeldi. Qazirgi ýaqytta EKSJ-nyń elektrondyq platformasyn Bitrix júıesimen ıntegratsııalaý aıaqtalýǵa jaqyn.
— Otyrys barysynda Qanat Bozymbaev jelilerdiń uzyndyǵy, qarjylandyrý kólemi jáne óńirler bólinisi boıynsha naqty parametrler kórsetilgen EKSJ-ny júzege asyrýdyń bekitilgen Jospar-kestesine qaramastan, jekelegen kórsetkishter boıynsha artta qalý faktileri bar ekenin atap ótti. Árbir kórsetkish boıynsha jaýapty memlekettik organdar bekitilgen. Vıtse-premer nysanaly ındıkatorlarǵa qol jetkizý týraly egjeı-tegjeıli aqparat usynýdy talap etti. Merzimderdiń sozylýy jaǵdaıynda laýazymdy tulǵalardyń jeke jaýapkershiligi qaralatyn bolady, — delingen habarlamada.
Atap aıtqanda, Ulttyq ekonomıka, ónerkásip jáne qurylys mınıstrlikterine TKSh Qazortalyǵymen jáne ákimdiktermen birlesip, 10 naýryzǵa deıin EKSJ-nyń elektrondyq platformasynda barlyq konkýrstardy jarııalaýdy jáne EPC-merdigerlerdi tolyq tirkeýdi qamtamasyz etý, sondaı-aq keń aýqymdy túsindirý jumystaryn júrgizý tapsyryldy.
Qarjylandyrý máseleleri boıynsha ákimdikterge qysqa merzimde máslıhattarmen birlesken otyrystar ótkizip, memlekettik baǵaly qaǵazdardy shyǵarý rásimderin jedeldetý tapsyryldy.
Qarjy mınıstrligine «QTK» AQ-men birlesip, ótinimder túsken saıyn jobalardy súıemeldeýdi qamtamasyz etý júkteldi. «Báıterek» UBH» AQ-ǵa aıdyń sońyna deıin Dúnıejúzilik bankti tarta otyryp, kárizdik-tazartý qurylystary jobalaryn qarjylandyrýdy kelisý jumystaryn jedeldetý tapsyryldy.
Jobalyq keńsege elektrondyq platformanyń jumysyna qatysty barlyq ótinishterge jedel áreket etý jáne EKSJ qatysýshylaryna satyp alýdyń barlyq kezeńderinde tehnıkalyq ári konsýltatsııalyq qoldaý kórsetý tapsyryldy.
Buǵan deıin Bozymbaev sý tapshylyǵy ekonomıkanyń damýyn tejeıtinin alǵa tartty.
