Qanat Bozymbaev: Biz Araldy qutqarý qorynyń reformasynan zor úmit kútemiz
ASTANA. KAZINFORM — Premer-mınıstrdiń orynbasary Qanat Bozymbaev Astana halyqaralyq forýmynda Qazaqstannyń sý sharýashylyǵyn damytý baǵytyndaǵy saıasatty qalaı úılestirip otyrǵanyn baıandady.
Vıtse-premer Qazaqstan Araldy qutqarý halyqaralyq qorynyń aıasyndaǵy yntymaqtastyqqa erekshe nazar aýdaratynyn atap ótti. Resmı Astana uıym aıasynda moınyna alǵan mindettemelerdi berik ustanatynyn aıtqan ol qordyń qurylymy men sharttyq-quqyqtyq bazasyn odan ári jetildirý baǵytyndaǵy bastamalaryn qoldaıtynyn aıtty.
— Biz Araldy qutqarý halyqaralyq qoryn reformalaý baǵytynda keleshek ýaǵdalastyqtardan zor úmit kútemiz. Bul Ortalyq Azııadaǵy mańyzdy uıymǵa múshe elderdiń báriniń múddesin eskere otyryp, tıimdiligin arttyrýǵa baǵyttalǵan, — dep atap ótti Qanat Bozymbaev.
Premer-mınıstrdiń orynbasary sý salasyndaǵy memlekettik saıasattyń negizgi baǵyttaryn atady. Qazaqstan 42 jańa sý qoımasyn salyp, qoldanystaǵy 30 sý qoımasyn rekonstrýktsııalaýdy, sondaı-aq 14 myń shaqyrymnan astam sýarý arnalaryn jańǵyrtýdy josparlap otyrǵanyn málim etti. Bul sharalar sýarmaly jer kólemin arttyryp, tótenshe jaǵdaılarǵa tótep berýge jáne ekonomıkanyń túrli salalaryn turaqty sýmen qamtamasyz etýge múmkindik beretini de aıtyldy.
Qanat Bozymbaev sý sektoryn tsıfrlandyrý baǵytynda biryńǵaı sý kadastryn túzgen Hydro.gov.kz tsıfrlyq platformasy qurylyp jatqanyn atap ótti.
Aıta keteıik, elordada Astana halyqaralyq forýmy ótip jatyr.