Qanat Bozymbaev bastaǵan komıssııa Mańǵystaý oblysyna bardy
ASTANA. KAZINFORM — Premer-mınıstrdiń orynbasary Qanat Bozymbaev bastaǵan komıssııa Mańǵystaý oblysyna bardy. Komıssııa tótenshe jaǵdaıǵa baılanysty memlekettik organdardyń jumysyn úılestirip, oqıǵa ornynda qajetti sharalardy qabyldaıdy.
Komıssııa quramyna Qorǵanys mınıstri, Mańǵystaý oblysynyń ákimi, Eńbek jáne halyqty áleýmettik qorǵaý, Іshki ister, Tótenshe jaǵdaılar, Densaýlyq saqtaý jáne Kólik mınıstrlikteriniń basshylyǵy, Bas áskerı prokýror, sondaı-aq Shekara qyzmetiniń ókilderi kirdi.
Mańǵystaý oblysy ákimdiginiń habarlaýynsha, komıssııa músheleri qazirgi ahýaldy baǵalap, tótenshe jaǵdaıdyń saldaryn joıý boıynsha aldaǵy sharalardy aıqyndaıdy.
— Negizgi nazar qaza tapqan áskerı qyzmetshilerdiń otbasylaryna qajetti kómek kórsetýge, oqıǵanyń mán-jaıyn anyqtaýǵa jáne memlekettik organdar men tıisti qyzmetterdiń jumysyn úılestirýge aýdarylady, — delingen habarlamada.
Komıssııanyń jumysy oqıǵa ornynda jalǵasyp jatyr.
Eske salaıyq, 2026 jylǵy 24 qyrkúıekte Kaspııdegi áskerı oqý-jattyǵý kezinde 9 áskerı qyzmetshi qaza tapqanyn habarlaǵanbyz. Úsh áskerı qyzmetshi qutqaryldy. Olardyń bireýi aýrýhanaǵa jatqyzyldy. Qalǵandaryn izdeý jumystary jalǵasyp jatyr.
Keıinirek áskerı qyzmetshilerdiń qaza bolý faktisi boıynsha qylmystyq is qozǵalyp, tergelip jatqanyn jazdyq.
Mańǵystaý oblysynda áskerı qyzmetshilerdiń qaza bolý sebepterin tergep-tekserý jónindegi úkimettik komıssııa quryldy.
Komıssııa quramyna qorǵanys mınıstri, Mańǵystaý oblysynyń ákimi, Eńbek jáne halyqty áleýmettik qorǵaý, Tótenshe jaǵdaılar, Densaýlyq saqtaý, Kólik mınıstrlikteriniń basshylyǵy, Bas áskerı prokýror, sondaı-aq shekara qyzmetiniń ókilderi kirdi.
Sonymen qatar, Prezıdent Qasym-Jomart Toqaev Mańǵystaý oblysynda áskerı oqý-jattyǵý kezindegi qaıǵyly oqıǵa saldarynan qaza tapqan áskerı qyzmetshilerdiń týǵan-týystaryna kóńil aıtty.
Áskerılerdiń qazasynan keıin Aqtaýda úsh kúnge josparlanǵan merekelik sharalar ótpeıtin boldy.
25 qyrkúıek Qazaqstanda jalpyulttyq aza tutý kúni bolady.
