Qanat Bozymbaev: «Aýyl amanaty» qarajaty jobany tıimdi iske asyryp jatqan óńirlerge qaıta bólinedi
TÚRKІSTAN. KAZINFORM – Túrkistan oblysynda Premer-mınıstrdiń orynbasary Qanat Bozymbaevtyń tóraǵalyǵymen «Aýyl amanaty» jobasynyń iske asyrylý barysyna arnalǵan respýblıkalyq kóshpeli keńes ótti. Bul týraly Úkimettiń baspasóz qyzmeti habarlady.
2023–2025 jyldary joba aıasynda Túrkistan oblysynda 4 223 joba qarjylandyrylyp, 4 635 jańa jumys orny quryldy. Sonymen qatar 593 jylyjaı salyndy, 76,8 myńnan astam aýyl sharýashylyǵy maly satyp alyndy, 79 qaıta óńdeý kásiporny iske qosyldy. Joba aıasynda jyl saıyn shamamen 80 mlrd teńgeniń aýyl sharýashylyǵy ónimi óndirilýde. Jobany iske asyrý nátıjesinde oblystyń 441 turǵyny ataýly áleýmettik kómek alýshylar sanatynan shyqty.
Bıyl «Aýyl amanaty» baǵdarlamasy aıasynda 583 joba qarjylandyrylyp, 1 234 jańa jumys ornyn ashý josparlanyp otyr.
Premer-mınıstrdiń orynbasary tóraǵalyq etken keńeste Úkimettiń aýyl turǵyndarynyń ál-aýqatyn arttyrýǵa baǵyttalǵan memlekettik qoldaýdyń barlyq sharalaryn, onyń ishinde «Aýyl amanaty» jobasyn júıeli túrde júzege asyryp jatqany atap ótildi.
Sonymen qatar keıbir óńirlerde bıýdjet qarajatyn ıgerý deńgeıiniń tómen ekeni atap ótildi. Atap aıtqanda, Aqmola, Atyraý jáne Jambyl oblystarynda bul kórsetkish respýblıka boıynsha eń tómen deńgeıde qalyp otyr.
– Eger bul jaǵdaı ózgermese, tamyz aıynyń qorytyndysy boıynsha jobaǵa jaýapty saıası memlekettik qyzmetshilerge qatysty tıisti sharalar qaralatyn bolady. Osyǵan baılanysty Ulttyq ekonomıka mınıstrligine qarajatty ıgerý deńgeıi tómen oblystardan jobany sapaly ári tıimdi iske asyryp jatqan óńirlerge qaıta bólý máselesin qarastyrýdy tapsyramyn. Al oblys ákimdikteri 2025 jyly «Aýyl amanaty» baǵdarlamasyn iske asyrýǵa bólingen qarajattyń aǵymdaǵy jyldyń tamyz aıyna deıin tolyq ıgerilýin qamtamasyz etýi tıis, - dep qorytyndylady keńesti Qanat Bozymbaev.
Aıta keteıik, Shardarada 31 myńnan astam turǵyndy aýyz sýmen qamtamasyz etetin toptyq sý qubyry paıdalanýǵa berildi.
