Qanat Bozymbaev «Aýyl amanaty» boıynsha jeńil nesıeni jedeldetýdi tapsyrdy
ASTANA. KAZINFORM — Premer-mınıstrdiń orynbasary Qanat Bozymbaev mınıstrlikterdiń, oblys ákimdikteriniń jáne «Amanat» partııasynyń qatysýymen óńirlik damý jónindegi joba keńsesiniń otyrysyn ótkizdi. Bul týraly Úkimettiń baspasóz qyzmeti málim etti.
Otyrysta «Aýyl amanaty» jobasyn júzege asyrý boıynsha atqarylǵan jumystar týraly, sondaı-aq byltyr qarasha aıynda ótken aýyl ákimderiniń dıalog-platformasynyń qorytyndysy boıynsha Memleket basshysy bergen tapsyrmalardyń oryndalý barysy jóninde esep tyńdaldy.
2025 jyldan bastap «Aýyl amanaty» jobasy jańa qaǵıdattar negizinde júzege asyrylýda. Qarjylandyrý óńirlerdiń naqty qajettilikterin eskere otyryp jáne artyq bıýrokratııalyq rásimdersiz bólinýde. Negizgi nazar kooperatsııany damytý men aýyl sharýashylyǵy ónimderin óńdeýge aýdarylǵan.
— 2025 jyly jobaǵa oblys ákimdikterine 50 mlrd teńge bólindi. 2026 jyly respýblıkalyq bıýdjette jobany jalǵastyrýǵa 100 mlrd teńge qarastyrylǵan, onyń shamamen 60 mlrd teńgesi 600-ge jýyq kooperatıvti qoldaýǵa baǵyttalmaq, — delingen habarlamada.
Otyrysta Aqmola oblysynyń Ereımentaý aýdanynda et klasterin qurý jobasyn iske qosý perspektıvalaryna erekshe kóńil bólindi. Joba óńir úshin mańyzdy mánge ıe. Osyǵan baılanysty Qanat Bozymbaev memlekettik qoldaý baǵdarlamalaryn eskere otyryp, jobanyń ekonomıkalyq jáne uıymdastyrýshylyq parametrlerin qosymsha pysyqtaýdy tapsyrdy.
— Keńes qorytyndysy boıynsha Premer-mınıstrdiń orynbasary Ulttyq ekonomıka mınıstrligine áleýmettik-kásipkerlik korporatsııalardyń qyzmetin qaıta pishimdeý jóninde usynystar daıyndaýdy, sondaı-aq «Aýyl kásipkerligi ınfraqurylymy» baǵytyn óńirlik standarttar júıesine engizýdi tapsyrdy, — dep habarlady Úkimetten.
«Damý» kásipkerlikti damytý qory» AQ-men birlesip, «Aýyl amanaty» jobasy aıasynda kepildik berý tetikterin ázirleý jáne tıisti normatıvtik-quqyqtyq aktilerge ózgerister engizý mindetteldi.
Oblys ákimdikterine eki apta merzimde «Amanat Nesie» aqparattyq júıesine barlyq óńirlerdiń tolyq qosylýyn qamtamasyz etip, aýyl turǵyndaryna «Aýyl amanaty» baǵdarlamasy boıynsha jeńildikti nesıeler berýdi uıymdastyrý tapsyryldy.
Buǵan deıin Qanat Bozymbaev Abaı oblysyndaǵy áleýmettik jáne mádenı nysandardyń qurylysyn tekserdi.