Qanat Bozymbaev Atyraý oblysynyń aldaǵy sý tasqynyna daıyndyǵyn tekserdi
ASTANA. KAZINFORM — Vıtse-premer Jylyoı, Mahambet aýdandarynda, Qulsary, Atyraý qalalarynda bolyp, eldi mekenderdi úlken sýdan qorǵaý jumystaryn tekserdi, dep habarlaıdy Úkimettiń baspasóz qyzmeti.
Jylyoı aýdanynda Qamyskól kóliniń jaǵalaýy nyǵaıtylýda. Jem ózeniniń arnasy 23 shaqyrym jáne Qursaı kanaly 35 shaqyrym tereńdetilgen. Nysandarǵa 100-den astam tehnıka jumyldyryldy.
Qulsary qalasynda Qanat Bozymbaev turǵyndarmen kezdesip, sý tasqynynan zardap shekkender úshin salynǵan turǵyn úıdiń sapasyn tekserdi.
Mahambet aýdanynda Jaıyq ózeniniń boıyndaǵy jaǵalaýdy nyǵaıtý jumystaryn tekserdi. Mahambet aýylynda 4,5 shaqyrymǵa sozylǵan jaǵalaý nyǵaıtylyp, Mahambet jáne Sarytoǵaı aýyldary arasyndaǵy kópir qurylysy aıaqtaldy. Aýyl ishindegi jol jóndelýde.
Atyraýda qala mańyndaǵy Talǵaıran, Aqjar jáne Erkinqala aýyldarynda qorǵanys bógetteri salynýda. Almaly aýylynda «Saryózek» kanalynyń boıyndaǵy 5,6 shaqyrym bógetter nyǵaıtylyp, Jaıyq ózeniniń boıynda uzyndyǵy 2,5 shaqyrym jańa jaǵalaý bekitkishteri salynyp jatyr.
Jaıyq ózeni, Sokolok kanaly men Kaspıı teńizi arasyndaǵy negizgi býyn sanalatyn Gogol kanalyn tazartý jáne keńeıtý jumystary jalǵasýda. Jalpy uzyndyǵy 30 shaqyrym, eni 18 metr jáne tereńdigi 2 metr kanaldyń túbin tereńdetý jumystary júrgizilýde, búgingi kúni uzyndyǵy 9,5 shaqyrym ýchaskedegi jumystar aıaqtaldy.
Sý tasqyny kezeńi bastalǵannan beri Kaspıı teńizine quıatyn jerde Jaıyq ózeniniń saǵasyn tereńdetý jumystary júrgizilýde. Josparlanǵan jumystardyń jalpy uzyndyǵy 10 shaqyrym, onyń 9,5 shaqyrymy aıaqtaldy.
Sondaı-aq oblys aktıvine Memleket basshysynyń tapsyrmasymen ázirlengen jáne jyl sońyna deıin iske qosylatyn sý tasqynyn boljaý men modeldeýdiń jańa júıesi – «Tasqyn» jumysy kórsetildi.
«Qazgıdromet» málimetinshe, qys jyly bolady dep kútilýde, qar kóp bolady, sondyqtan biz barlyq qajetti sharalardy aldyn ala qabyldap, barlyq múmkin stsenarıılerdi eskerýimiz kerek. Sondyqtan jumysty qarqyndatýymyz kerek. Merdigerlik uıymdardy eki aýysymǵa aýystyrý, qosymsha kúsh pen tehnıkany tartý qajet. Tótenshe jaǵdaılar mınıstrligi óńirdegi barlyq sý tasqynyna qarsy sharalardy baqylaýǵa alyp, monıtorıng júrgizsin», — dep tapsyrdy Qanat Bozymbaev.
