Qanat Bozymbaev Atyraý oblysynda tótenshe jaǵdaı jarııalaýdyń sebebin túsindirdi
ASTANA. KAZINFORM – Atyraý oblysyna Reseı aýmaǵynan 15-20 kún ishinde iri sý keledi dep kútilip otyr. Bul týraly QR Premer-Mınıstriniń orynbasary Qanat Bozymbaev málimdedi.
«Qulsary qalasynda (Atyraý oblysy) 2 810 úı sý astynda qaldy. Tótenshe jaǵdaı aımaqtarynan 29 myń adam, onyń ishinde 7 myńnan astam bala evakýatsııalandy. Keshe jáne búgin biz sý basqan eldi mekenderge bardyq. Jem ózeniniń aǵysymen Aqtóbe oblysynyń shekarasyna deıin búginde sý deńgeıiniń tómendeýi baıqalady. Sońǵy táýlikte sýdyń kóterilýi 6 santımetrge seıildi. Biraq, biz Qulsary jaqqa 3-4 kún ishinde taǵy sý aǵynyn boljap otyrmyz», - dedi Qanat Bozymbaev OKQ alańynda.
Úkimet basshysy orynbasarynyń aıtýynsha, Atyraý oblysyndaǵy Jaıyq ózeni deńgeıiniń boljamdy kóterilýine baılanysty Aqtóbe oblysynyń Elek ózeninen aǵyp ketýine jáne Reseı Federatsııasynyń Irıklın sý qoımasynyń joǵarylaýyna baılanysty aımaqta Jaıyq ózeni arqyly sý basý qaýpi áli de saqtalady.
«Bul - úlken táýekel. Men oblys ákimdigine múddeli memlekettik vedomstvolarmen birlesip, eki kúnniń ishinde Jaıyq ózeni boıynsha sý tasqyny boljamyn aıaqtaý týraly tapsyrma berdim. Jaıyq ózeni boıy Atyraý qalasynyń shekarasynda shamamen 15-20 kúnde sý tasýdyń aıtarlyqtaı ósýin boljap otyrmyz. Óıtkeni Reseı Federatsııasymen shekaradan shamamen 20-25 kúnde sý aǵyny kútiledi. Biraq, jaǵdaı sýdyń kólemi men aýa raıyna baılanysty», - dep túsindirdi Q. Bozymbaev.
Sondaı-aq óńir ákimdiginiń Atyraý qalasy men jaqyn mańdaǵy aýdandar aınalasynda qorǵanys bógetteri men qurylystaryn, aınalma jáne quıma arnalardy salý boıynsha naqty jospar ázirleıtini atap ótildi.
«Osyǵan baılanysty Atyraý oblysynyń ákimi búgin tótenge jaǵdaı rejımi jarııalady. Osy múmkindikti paıdalana otyryp, Atyraý qalasynyń turǵyndaryna júgingim keledi, dúrbeleńge eshqandaı sebep joq. Halyqtyń bir bóligi ketýge bılet satyp alyp, kólikterin janarmaımen qamtyp jatqanyn estip otyrmyn», - deıdi vıtse-premer.
Vıtse-premer aldaǵy 10-15 kúnde Jaıyq ózeniniń tasýyna alańdaýǵa eshqandaı sebep joq dep sendirdi.
«Atyraý oblysynda tótenshe jaǵdaı rejımi 15-20 kún shamasynda kútiletin iri sý tasqynynyń aldyn alý jáne naqty daıyndalý úshin jarııalandy. Ákimdik jospar ázirlep, erteń ony usynýy tıis, biz ony respýblıkalyq shtabta qaraıtyn bolamyz», - dep tolyqtyrdy Qanat Bozymbaev.
Buǵan deıin vıtse-premer sý basqan óńirlerdegi sońǵy jaǵdaıdy aıta kele, 6 óńirde 3 698 jeke úı sý astynda qalyp, avtojoldardyń 155 ýchaskesin sý shaıǵanyn málim etti.
