Qanat Bozymbaev Almatydaǵy esepteý aspaptaryn shyǵaratyn kásiporyndarǵa bardy
ASTANA. KAZINFORM – Almaty qalasyna jumys sapary barysynda Premer-Mınıstrdiń orynbasary Qanat Bozymbaev energııa resýrstaryn esepke alý aspaptaryn shyǵaratyn otandyq kásiporyndardyń qyzmetimen tanysty.
Jumys saparyna Almaty qalasynyń ákimi Darhan Satybaldy, ónerkásip jáne qurylys vıtse-mınıstri Jánnat Dúbirova, «TKSh QazOrtalyq» AQ basqarma tóraǵasy Nurlan Soltambekov qatysty.
Delegatsııa «Nero Group» JShS men «SAIMAN korporatsııasy» JShS-niń óndiristik alańdaryn aralady. Atalǵan kásiporyndarda elektr energııasyn, sýdy, gazdy jáne jylýdy esepke alý aspaptary óndiriledi, sondaı-aq energııa resýrstaryna monıtorıng jasaýdyń tsıfrlyq júıeleri engizilýde.
NERO kompanııalar toby – «Alataý ITP» arnaıy ekonomıkalyq aımaǵynyń rezıdenti. Kásiporynnyń óndiristik qýaty jylyna 1,2 mln elektr energııasyn esepke alý aspabyn, 1,5 mln sý eseptegishin, 1 mln gaz eseptegishin jáne 25 myńǵa deıin jylý energııasyn esepke alý aspaptaryn shyǵarýǵa múmkindik beredi. Qyzmetkerler sany — 150 adam. Ótken jyldyń qorytyndysy boıynsha «NERO INDUSTRIES» JShS-niń óndiris kólemi 20 mlrd teńgege jetip, jergilikti qamtý deńgeıi 70%-dy qurady. Bıyl bul kórsetkishti 95%-ǵa deıin arttyrý josparlanyp otyr.
Tanysý barysynda kabel ónimderin óndirýdi iske qosý jáne gaz esepteý aspaptarynyń jelisin keńeıtý josparlary usynyldy. Sondaı-aq Energo University (AEBÝ) birlesip júzege asyrylatyn Smart Energy ǵylymı-bilim berý klasterin qurý bastamasy tanystyryldy. Bul joba ınjenerlik kadrlardy daıarlaýǵa jáne energetıka salasyndaǵy qoldanbaly zertteýlerdi damytýǵa baǵyttalǵan.
«SAIMAN korporatsııasy» JShS-ne barǵan kezinde delegatsııa 30 jyldan astam ýaqyt boıy elektrotehnıkalyq ónimder men energııa resýrstaryn esepke alý aspaptaryn shyǵaryp kele jatqan kásiporynnyń óndiristik ınfraqurylymymen tanysty.
SAIMAN kásiporny jylyna 800 myńǵa deıin elektr energııasyn esepke alý aspabyn, 600 myń sý eseptegishin, 300 myń gaz eseptegishin jáne 8 myńǵa deıin jylý eseptegishin óndirýge qaýqarly. Kásiporynda 210 adam eńbek etedi. Óndiriletin barlyq ónim otandyq taýar óndirýshiler tizilimine engizilgen, qajetti sertıfıkattarǵa ıe, al ishki qosylǵan qunnyń ortasha úlesi 65%-ǵa jetedi.
Qanat Bozymbaev energetıkalyq jáne kommýnaldyq sektordy jańǵyrtý jónindegi ulttyq jobany júzege asyrýda otandyq taýar óndirýshilerdi qoldaýdyń mańyzdylyǵyn atap ótti. Qazirgi ýaqytta esepke alý aspaptaryna qoıylatyn biryńǵaı talaptar men standarttardy qalyptastyrý, tsıfrlyq jáne «aqyldy» tehnologııalardy engizý jáne olardy turǵyn úı-kommýnaldyq sharýashylyqtyń barlyq sektorlaryna, sondaı-aq el aýmaǵynda keńinen ıntegratsııalaý boıynsha júıeli jumys júrgizilýde. Bul resýrstardy esepke alýdyń ashyqtyǵy men tıimdiligin arttyrýǵa, rásýá men qarjylyq shyǵyndardy azaıtýǵa, sondaı-aq kommýnaldyq qyzmetterdiń sapasyn jaqsartýǵa múmkindik beredi.
Aıta keteıik, Óskemende elektr jelisindegi apat qalpyna kelip, 12 myń úıge qaıta jaryq berildi.