Qanat Bozymbaev Alataýǵa bilikti kadrlardy tartý josparyn aıtty
ASTANA. KAZINFORM — Alataý qalasyna bilikti kadrlardy tartý úshin júıeli sharalar qabyldanady. Bul týraly Quryltaı depýtattarynyń saýalyna Premer-mınıstrdiń orynbasary Qanat Bozymbaevtyń jaýabynda aıtylǵan.
— «Jaıly mektep» ulttyq jobasy aıasynda Alataý qalasynyń Qoıanqus shaǵyn aýdanynda 900 oryndyq jańa jalpy bilim beretin mektep paıdalanýǵa berildi. «Aýyldyq densaýlyq saqtaýdy jańǵyrtý» ulttyq jobasy boıynsha Alataý qalasynda eki feldsherlik-akýsherlik pýnkt ashyldy: 2025 jyly Eńbek shaǵyn aýdanynda, 2026 jylǵy sáýirde Jańaarna shaǵyn aýdanynda, — dedi vıtse-premer.
Onyń aıtýynsha, Alataýdyń qala mártebesin alýyna baılanysty kadrlardy qoldaý úshin «Dıplommen aýylǵa» baǵdarlamasy boıynsha eki jyldyq ótpeli kezeń belgilendi. Bul bıýdjet salasynyń qyzmetkerleri úshin 25 paıyzdyq ústemaqyny saqtaýǵa múmkindik beredi.
— Aldaǵy ýaqytta Alataý qalasyna bilikti kadrlardy tartý jáne olardy uzaq merzimge ornyqtyrý úshin ómir súrý sapasyn arttyrý, qalalyq ortany damytý jáne qolaıly jaǵdaılar jasaý jóninde júıeli sharalar qabyldanady, — dedi Qanat Bozymbaev.
Aıta keteıik, Alataý qalasyn damytýǵa baǵyttalǵan úsh strategııalyq qujat 2026 jyldyń sońyna deıin bekitilmek.
Buǵan deıin Quryltaı depýtaty Alataý qalasy turǵyndarynyń basty problemalaryn ataǵan edi.
Sonymen qatar qala mektepteriniń birinde qozǵalysty jáne jabdyqtardyń jaı-kúıin baqylaıtyn júıe synaqtan ótip jatyr.
