Qanat Bozymbaev Alatau City jobasynyń damý barysymen tanysty
ASTANA. KAZINFORM - Premer-mınıstrdiń orynbasary Qanat Bozymbaev Almaty oblysyna resmı jumys sapary aıasynda Alatau City megajobasynyń tórt negizgi aımaǵynda – Gate, Golden, Growing jáne Green aýdandarynyń qurylysqa daıyndyq barysyn tekserip, birqatar tapsyrma berdi, dep habarlaıdy Úkimettiń baspasóz qyzmeti.
Ónerkásiptik-logıstıkalyq jáne iskerlik ortalyqtan bastap, ǵylymı-bilim berý men týrıstik klasterlerge deıin ár aýdannyń ózindik baǵyty bar.
Gate District Ótegen batyr, Pokrovka, Qoıanqus, Yntymaq jáne Jańalyq eldi mekenderiniń arasynda ornalasqan. Munda PepsiCo, Caspian Group, Almaty jeldetkish zaýyty sııaqty iri jobalar júzege asyrylýda. Aýdannyń basty ortalyǵy – Iconic Building-1 Halyqaralyq bıznes damytý ortalyǵy bolmaq. Qanat Bozymbaev ÓQM, oblys ákimdigi jáne ınvestorlarǵa bul ǵımarattyń qurylysyn jedeldetýdi tapsyrdy. Onyń aıtýynsha, bul nysan Alatau City jobasynyń resmı bastamasynyń sımvolyna aınalmaq.
Golden District Kishi Almaty jáne Qaskeleń ózenderiniń arasyndaǵy tasjol boıynda ornalasqan. Bul aımaq ǵylym, bilim jáne medıtsına ortalyǵy retinde damytylmaq. Munda: K-Park mádenı-bıznes kesheni, halyqaralyq bilim berý ortalyǵy, zamanaýı akademqalashyq, kópsalaly medıtsınalyq klaster boı kóteredi. Sonymen qatar Hyundai Green Food Almaty jáne Mars sııaqty álemdik kompanııalardyń jobalaryn júzege asyrý josparlanǵan.
Growing District Almaty – Qapshaǵaı avtojoly boıynda jáne Jetigen – Qazybek temirjol jelisiniń mańynda ornalasady. Bul aımaq eksportqa baǵyttalǵan óndiristik jáne logıstıkalyq ortalyq retinde damytylady. Kólik dálizderiniń toǵysynda ornalasýy jáne áýejaıǵa jaqyndyǵy ekologııalyq taza óndiristerdi damytýǵa erekshe múmkindik beredi.
Qanat Bozymbaev bul jerde halyqaralyq Rhenus Logistics kompanııasynyń basshylyǵymen kezdesip, Alataýda kólik-óndiristik hab qurýdaǵy yntymaqtastyq máselelerin talqylady. Aýmaǵy 31 730 gektardy quraıtyn Green District Qapshaǵaı sý qoımasymen, Qaskeleń ózenimen jáne Qonaev qalasymen shektesedi. Munda kýrorttyq aımaqtar men saıabaqtar salynyp, bolashaqta Formýla-1 jarys tasjoly, Iconic Building-2 týrıstik ortalyǵy boı kóteredi. Bul aımaq Almaty aglomeratsııasynyń basty týrıstik jáne demalys ortalyǵyna aınalmaq.
Jumys sapary barysynda Qanat Bozymbaev mınıstrlikter ókilderi, ınvestorlar, bıznes qaýymdastyǵy, halyqaralyq sarapshylar jáne Prezıdenttiń shtattan tys keńesshisi Vong Hen Faınnyń qatysýymen Jobalyq ofıs otyrysyn ótkizdi. Jıynda otandyq jáne sheteldik ınvestıtsııalardy qorǵaý, kelisimsharttardyń turaqtylyǵyn qamtamasyz etý, Qytaıdyń CRDI kompanııasymen birlesken keńes berý tetikteri, Alataý qalasynyń damý keńesin qurý jáne Alatau City Authority memlekettik qorynyń Jarǵysyn bekitý sııaqty máseleler qaraldy. Sonymen birge Memleket basshysynyń Alataý qalasyn damytý jónindegi Jarlyǵynyń oryndalý barysy jáne «Alataý qalasynyń arnaıy mártebesi týraly» Konstıtýtsııalyq zań jobasynyń oryndalý barysyn da talqylady.
Kezdesý qorytyndysy boıynsha Qanat Bozymbaev jaýapty memlekettik organdarǵa Alataý qalasyn damytýda keshendi tásil qoldanýdy jáne tıimdi úılestirýdi qamtamasyz etýdi tapsyrdy.
Osyǵan deıin Úkimet basshysy Laslo Kevermen ekijaqty yntymaqtastyq máselelerin talqylaǵany týraly jazdyq.