Qanat Bozymbaev Aqtóbe oblysynda sý tasqyny kezeńiniń ótýin tekserdi
AQTÓBE. KAZINFORM – Aqtóbe oblysy – sý basý qaýpi joǵary aýmaqtar tiziminde. Jyl saıyn naýryz aıynyń sońynda erigen qar sýlarynan aýyldarǵa qaýip tónedi. Búgingi tańda jaǵdaı baqylaýda: ahýal turaqty, Tasqyn aqparattyq júıesin paıdalaný arqyly turaqty túrde monıtorıng júrgizilip jatyr.
Kúni keshe vıtse-premer óńirge bardy, Tasqyn júıesiniń boljamdy derekterin taldap, ózender men saı-saladaǵy sý deńgeıin naqty ýaqyt rejıminde baqylap otyrǵan ahýaldyq ortalyqtyń jumysyn kórdi, sondaı-aq shuǵyl otyrys ótkizdi.
Búgin Qanat Bozymbaev Qobda aýdanynda boldy, sodan keıin Oıyl, Temir, Baıǵanın, Muǵaljar jáne Alǵa aýdandarynyń aýmaǵyn áýeden sholyp shyǵyp, eldi mekenderdi sý tasqynynan qorǵaýdy qamtamasyz etetin negizgi nysandardy tekserdi.
Qanat Bozymbaev Qobda aýdanynda qorǵanys bógetterin, Oıyl aýdanynda – Oıyl aýylyndaǵy ózen arqyly ótetin kópirdi jáne Qaratal aýylyndaǵy qorǵanys bógetin tekserdi. Temir aýdanynda «Babataı» qysymsyz sý burý bógetine aerovızýaldy tekserý júrgizdi. Baıǵanın aýdany boıynsha Eńbekshi jáne Shubarshy aýyldarynda qorǵanys bógetteriniń qurylysyn, sondaı-aq Shubarqudyq aýylynda erigen qar sýyn burý arnalarynyń qurylysyn qarap shyqty.
Jem ózeniniń boıyndaǵy qorǵanys qurylystarynyń jaǵdaıyna erekshe nazar aýdaryldy. Baıǵanın aýdanynda vıtse-premer ózen saǵasyn aralap kórdi. Jańatań aýylynda 1,2 shaqyrymdy quraıtyn qorǵanys bógeti nyǵaıtylyp, arnalar keńeıtildi, muz keptelisi arshyldy.
Muǵaljar aýdanynda Tasqyn aqparattyq júıesiniń derekterine sáıkes qaýipti aımaqtaǵy eldi mekenderdiń jaǵdaıy tekserildi. Jem ózeniniń boıynda Jaǵabulaq aýylynan 3,3 shaqyrym jáne ońtústik-batysqa qaraı 1 shaqyrymdyq qorǵanys bógetteri salyndy. Saǵashıli aýylynda 2 shaqyrymdyq qorǵanys bógeti salyndy, aýylishilik jáne aýdandyq mańyzy bar avtomobıl joldaryndaǵy aryqtar men sýaǵar qubyrlary tolyǵymen tazartyldy.
Oblys aýmaǵyn baǵamdaý barysynda vıtse-premer Aqtóbe qalasynyń batys bóligin sý tasqynynan qorǵaıtyn Sazdy sý qoımasynyń salalaryn qarap shyqty. Qarǵaly jáne Aqtóbe sý qoımalarynyń jaıyn áýeden baqylap kórdi. Birinshi nysan qaıta jańartýǵa ázirlik ústinde, al ekinshisi tolyǵymen jóndeýden ótti.
Oblysta sý tasqynynyń qaýpi joǵary 58 eldi meken erekshe baqylaýǵa alyndy. Sondaı-aq 206 sý sharýashylyǵy qurylymy – qatań baqylaýda.
Oblys ákimi Ashat Shaharovtyń aıtýynsha, jaǵalaýlardy nyǵaıtý, ózen arnalaryn tereńdetý jáne tazartý jumystary júrgizildi (45 shaqyrym). 38,7 shaqyrym jańa qorǵanys bógetteri turǵyzyldy, qoldanystaǵy 32 shaqyrym bógetter jóndeldi, 19 gıdrotehnıkalyq qurylystar salyndy, 155 sý ótkizý qurylymdary men qubyrlar ornatyldy jáne jóndeldi, 150 shaqyrymnan astam aryqtar men sý aǵarlar tazartyldy.
Óńirdiń azamattyq qorǵaý qyzmetteri joǵary daıyndyq rejımine aýystyryldy. Onyń quramynda 3 625 adam, 1 122 tehnıka, 103 júzý quraly bar. Óńirde Almaty jáne Qyzylorda oblystarynyń kúshteri men quraldary jumys istep jatyr. Oıyl ózeniniń paromdyq ótkelin qamtamasyz etý úshin Qorǵanys mınıstrliginiń ınjenerlik-saperlik brıgadasynyń qyzmetkerleri aımaqqa jetti.
Turǵyndar qaýipsizdigin qamtamasyz etý jáne eldi mekenderdi, ınfraqurylymdy, aýyl sharýashylyǵy alqaptaryn sý basý qaýpin azaıtý maqsatynda Qanat Bozymbaev óńir ákimdigi men TJM-ge sý tasqyny jaǵdaıyna táýlik boıy monıtorıng júrgizýdi, ózenderdegi sý deńgeıin baqylaýdy, sý qoımalarynan sý jiberýdi retteýdi erekshe qadaǵalaýdy tapsyrdy.