Qanat Bozymbaev Aqtaý mańyndaǵy ushaq apatynan zardap shekkenderdiń jaǵdaıymen tanysty

ASTANA. KAZINFORM – QR Premer-mınıstriniń orynbasary Qanat Bozymbaev bastaǵan úkimettik komıssııa Mańǵystaý oblystyq kópsalaly aýrýhanasyna baryp, zardap shekken azamattardyń jaǵdaıyn surady.

Mańǵystaý oblysynyń ákimi Nurdáýlet Qılybaıdyń aıtýynsha, apat ornynda 22 jedel járdem brıgadasy men apattyq medıtsına ortalyǵynyń 6 brıgadasy jumyldyryldy. 

Oblystyq kópsalaly aýrýhanada hırýrgııalyq jáne travmatologııalyq bólimde 30 oryn jáne 10 reanımatsııalyq oryn daıyndaldy. 

Zardap shekkenderdiń jalpy sany — 29 adam. Olardyń ishinde 11 adamnyń jaǵdaıy turaqty, biraq, háli aýyr. 

Qazir oblystyq aýrýhanaǵa 27 adam jetkizildi. Aýrýhanaǵa túsken 27 patsıenttiń 13-i ázerbaıjan eliniń azamaty, 9 Reseı azamaty, 2 qyrǵyz azamaty jáne 3 azamattyń jeke basy anyqtalyp jatyr. 

Qazir óńirdegi balalar aýrýhanasynda eki bala medıtsınalyq kómek alyp jatyr. Barlyq patsıent dıagnostıka jáne emdeý hattamasyna sáıkes tolyq em alady. 

Sonymen qatar Úkimet basshysynyń orynbasary Qanat Bozymbaev jaýapty tulǵalarǵa sapaly em men tıisti kútimdi qamtamasyz etýdi tapsyrdy.

Buǵan deıin habarlanǵandaı, Aqtaýda júrgen QR Premer-mınıstriniń orynbasary Qanat Bozymbaev áýe apatyna qatysty sońǵy málimetpen bólisti.