Qanat Bozymbaev Abaı oblysynyń sý tasqynyna daıyndyǵyn tekserdi
ASTANA. KAZINFORM – Premer-Mınıstrdiń orynbasary Qanat Bozymbaev jumys saparymen Abaı oblysyna bardy. Óńir ákimi Berik Ýálımen, Tótenshe jaǵdaılar jáne Sý resýrstary jáne ırrıgatsııa mınıstrlikteriniń basshylyǵymen birlesip, sý tasqyny qaýpi bar aýmaqtarǵa monıtorıng júrgizildi.
Ózen arnalary, gıdrotehnıkalyq qurylystar, qorǵanysh bógetteri men sý ótkizý nysandary, sý basý qaýpi bar eldi mekender, sondaı-aq qar jamylǵysynyń jaǵdaıy tekserildi.
Vıtse-premer Semeı qalasyna, Jarma, Abaı, Borodýlıha jáne Aıagóz aýdandaryna áýeden sholý jasady. Sondaı-aq Aıagóz qalasy men Shar sý qoımasyna baryp, aýdan ákimderimen kezdesti, sý tasý kezeńine daıyndyq týraly esepterdi tyńdap, birqatar tapsyrma berdi.
Oblys aýmaǵynda 64 eldi meken qaýip aımaǵynda ornalasqan: onyń úsheýinde sý basý qaýpi tolyq joıylǵan, 22-sinde táýekel tómendetilgen, 39-ynda qater saqtalyp otyr.
Sý tasqyny kezeńine daıyndyq sheńberinde ınjenerlik is-sharalar kesheni júzege asyryldy: shamamen 42 shaqyrym qorǵanys bógetteri salyndy jáne nyǵaıtyldy, 7 shaqyrymnan astam ózen arnalary jáne 4 shaqyrym drenajdyq ári sý burý júıeleri tazartyldy. Jergilikti atqarýshy organdar materıaldyq-tehnıkalyq jáne qarjylyq rezervter qalyptastyrýda. 275 myń tekshe metr qar shyǵaryldy, ózenderdegi muzdy jarý jumystary jalǵasýda.
Azamattyq qorǵaý júıesiniń kúshteri joǵary daıyndyq rejımine kóshirildi. 1 436 adam jáne 543 tehnıka birligi jumyldyryldy.
– Jalpy daıyndyq jumystary júrgizilýde. Alaıda áýeden sholý nátıjeleri aýa temperatýrasynyń kúrt kóterilýi jáne qardyń qarqyndy erýi jaǵdaıynda jekelegen ýchaskelerde ahýaldyń kúrdelený qaýpi saqtalyp otyrǵanyn kórsetti. Osyǵan baılanysty ózen arnalary men sý ótkizý qurylystaryn ýaqytyly tazalaýǵa, tehnıka, sorǵy jabdyqtary jáne avarııalyq brıgadalardyń daıyndyǵyna erekshe nazar aýdarý qajet. Gıdrometeorologııalyq jaǵdaı ózgergen kezde áreket etý jedel bolýy tıis. Jumys aldyn alý qaǵıdaty boıynsha júrgizilýi tıis, - dedi vıtse-premer.
Oblys ákimdigine sý tasqyny qaýpi bar ýchaskelerde táýlik boıy monıtorıng uıymdastyrý, eldi mekenderden qar shyǵarý jumystaryn jedeldetý, gıdrotehnıkalyq qurylystar men qorǵanys bógetterine qosymsha tekserý júrgizý, azamattyq qorǵaý kúshteri men quraldarynyń tolyq daıyndyǵyn qamtamasyz etý, evakýatsııa josparlaryn ózektendirý, ýaqytsha ornalastyrý pýnktteriniń daıyndyǵyn tekserý jáne halyqty ýaqtyly aqparattandyrý tapsyryldy.
Belgilengen merzimde atalǵan tapsyrmalardyń oryndalýy týraly Úkimetke naqty nátıjelermen jıyntyq aqparat usynylýy qajet.
Buǵan deıin Qanat Bozymbaevtyń EKSJ boıynsha artta qalǵan jobalardy jedeldetýdi talap etkenin jazǵanbyz.