Qanat Bozymbaev Abaı oblysyndaǵy áleýmettik jáne mádenı nysandardyń qurylysyn tekserdi

ASTANA. KAZINFORM – Premer-mınıstrdiń orynbasary Qanat Bozymbaev «Abaıǵa qurmet» respýblıkalyq aktsııasyn ótkizý boıynsha keńes ótkizdi. Bul týraly Úkimettiń baspasóz qyzmeti habarlady.

Ol Memleket basshysynyń bastamasymen iske qosyldy jáne Abaı Qunanbaıulynyń 180 jyldyǵyna oraılastyryldy. Aktsııa aıasynda elimizdiń barlyq óńirleri men respýblıkalyq mańyzy bar qalalar Abaı oblysyna bir-bir áleýmettik nemese mádenı nysan syıǵa tartady.

Keńeste Semeı qalasynyń Bas josparyna ózgerister engizý, arnaıy ekonomıkalyq aımaq (AEA) qurý máseleleri talqylandy. AEA quramyna 1200 gektar alańdy qamtıtyn jańa ákimshilik-iskerlik ortalyq, zamanaýı turǵyn úı keshenderi, 40-tan astam ákimshilik, kommertsııalyq jáne áleýmettik nysan kiretin bolady.
Semeı qalasynda jańa ınjenerlik ınfraqurylym, qazandyq, jylý, elektr, sý qubyry jáne sý burý jelilerin salý mindetteri qaraldy.

Búginde Abaı oblysynyń ákimdigi aktsııa aıasyndaǵy jobalardy júzege asyrý boıynsha óńirlermen belsendi jumys júrgizip jatyr. «Abaıǵa qurmet» aktsııasyn alǵashqylardyń biri bolyp Mańǵystaý oblysynyń turǵyndary qoldap, Dostyq úıiniń qurylysyn bastap ketti.

Túrkistan oblysy – kórme ortalyǵyn, Qyzylorda oblysy – «Anaǵa taǵzym» ǵımaratyn, Atyraý oblysy – «Abaı álemi» ortalyǵyn salady. Shymkent – Shyǵarmashylyq ortalyǵyn, Soltústik Qazaqstan oblysy – Memlekettik rámizder alańyn, Shyǵys Qazaqstan oblysy – Ertis ózeni jaǵalaýyn abattandyrady. Aqtóbe oblysy – Jekpe-jek saraıyn, Pavlodar oblysy – Ústel tennısi ortalyǵyn turǵyzady. Astana «Keleshek» mektebin syıǵa tartsa, Almaty – medıaortalyq, Qaraǵandy oblysy – botanıkalyq baq, Batys Qazaqstan oblysy – jelilik saıabaq, Qostanaı oblysy – Rýhanııat ortalyǵyn salady.

Qanat Bozymbaev qalǵan óńirlerge jobalardy aıqyndaý jáne júzege asyrý jumystaryn jedeldetýdi tapsyrdy.

– Úılestirilgen jumystyń nátıjesinde biz barlyq jobany biryńǵaı arhıtektýralyq stılde sátti aıaqtap, Abaı atyna laıyqty jáne óńirdiń bolashaǵy úshin mańyzdy ınfraqurylym quratynymyzǵa senimdimin, - dep atap ótti Qanat Bozymbaev.

Júktelgen mindetterdi tıimdi jáne ýaqytyly júzege asyrý úshin Premer-mınıstrdiń orynbasary Ónerkásip jáne qurylys, Qarjy, Ulttyq ekonomıka mınıstrlikterine jáne óńirlerdiń ákimderine birqatar tapsyrma berdi.

Aıta keteıik, Qyrǵyzstannyń Osh qalasynda Abaı Qunanbaevqa arnalǵan kóshe, eskertkish jáne mýzeı ashyldy.