Qanat Bozymbaev 12 adam opat bolǵan órt jaıynda: qylmystyq quram joq

ASTANA. KAZINFORM – Túrkistan oblysy Jetisaı aýdanynyń Alǵabas aýylynda jeke turǵyn úıde shyqqan órttiń qylmystyq quramy joq. Bul týraly Úkimet otyrysynda Premer-mınıstrdiń orynbasary Qanat Bozymbaev aıtty.

- Keshe saǵat 05.36-da Túrkistan oblysy Jetisaı aýdanynyń Alǵabas aýylynda jeke turǵyn úıden órt shyqty. Eki qabatty úı tolyǵymen órtke orandy, shatyr ishinara qulady. Tótenshe jaǵdaılar mınıstrliginiń kúshteri men quraldary dereý jiberildi, órt saǵat 07.22-de sóndirildi. Ókinishke oraı, órt ornynda 12 adam qaza tapty, olardyń 9-y - balalar. 3 adam zardap shekti, olar qazir Jetisaı aýdandyq ortalyq aýrýhanasynyń jansaqtaý bóliminde jatyr, - dedi ol.

Úkimet basshysy orynbasarynyń aıtýynsha, oqıǵa ornynda tergeý sharalary júrgizilip, órttiń shyǵý sebebi anyqtalyp jatyr. Aldyn ala qylmystyq quram joq. «Órt qaýipsizdigi talaptaryn buzý» baby boıynsha sotqa deıingi tergeý bastaldy.

- Sizdiń tapsyrmańyz boıynsha keshe men Úkimettik komıssııanyń otyrysyn ótkizdim, jerleý rásimin uıymdastyrý jáne qaza tapqandar men zardap shekkenderdiń otbasylaryna kómek kórsetý, órttiń týyndaý sebepterin anyqtaý, sondaı-aq osyndaı jaǵdaılardyń aldyn alý sharalaryn júrgizý boıynsha birqatar tapsyrma berdim, - dedi Qanat Bozymbaev Úkimet basshysyna.

Keshe tańerteń Jetisaı aýdanynyń Alǵabas aýylynda eki qabatty jeke turǵyn úı órtenip, 12 adam mert boldy.

Prezıdent Qasym-Jomart Toqaev Túrkistan oblysy Jetisaı aýdanyndaǵy jeke úıde bolǵan órttiń saldarynan kóptegen adamnyń qaza tabýyna baılanysty kóńil aıtty.

Úkimet pen Túrkistan oblysynyń ákimine zardap shekken azamattardyń týǵan-týystaryna barlyq qajetti kómek kórsetip, qaıǵyly oqıǵany jan-jaqty tekserýdi tapsyrdy.