Qanat Baıǵarın: «Bolashaqtyqtardy» jumysqa ornalastyrýda túıitkilder joq emes
ASTANA. QazAqparat - Qazaqstan Respýblıkasynyń 2025 jylǵa deıingi strategııalyq damý josparynda shetelden oqyp keletin bilikti jastarymyzdy jumyspen qamtý máselesine erekshe den qoıý kerek. Bul týraly búgin sarapshylar birlestigimen ótken ashyq dıalog barysynda Nazarbaev Ýnıversıtetiniń Innovatsııalar boıynsha vıtse-prezıdenti Qanat Baıǵarın málim etti, dep habarlaıdy «QazAqparat» HAA tilshisi.
Aıta ketsek, sarapshylardyń atalǵan bas qosýynda QR Ulttyq ekonomıka mınıstri Tımýr Súleımenov Qazaqstan Repsýblıkasynyń 2025 jylǵa deıingi strategııalyq damý josparyn tanystyrǵan bolatyn.
Mınıstrdiń aıtýynsha, atalǵan qujatta 7 reformaǵa basymdyq beriletin bolady. Qujattyń eń birinshi - «Jańa adamı kapıtal» atty reformasynda «Ekonomıkalyq ósimdi bilim negizinde qalyptastyrý» josparyna basymdyq berilgen.
Strategııalyq qujattyń bilim salasyna qatysty tarmaǵyna Nazarbaev Ýnıversıtetiniń Innovatsııalar boıynsha vıtse-prezıdenti Qanat Baıǵarın oıyn bildirdi.
«Qazirgi ýaqytta Nazarbaev mektepteriniń júıesi aqyryndap jalpy mektepterge engizilip jatyr. Nazarbaev ýnıversıteti de óziniń bilim berý tájirıbesi men tártibin basqa joǵary oqý oryndaryna bólisýde. Aǵylshyn tilinde sabaq berý júıesi de óte mańyzdy element. Biz ǵana emes, bizdiń kórshiler de, basqa memleketter de damý ústinde. Biz bul úrdisti eskerýimiz kerek», - deıdi Qanat Baıǵarın.
Onyń aıtýynsha, memleket qurylymyndaǵy osynaý mańyzdy salada máseleler de joq emes.
«Máselen, «Bolashaq» baǵdarlamasymen oqyp kelgenderdiń jumysqa ornalasýy boıynsha másele joq dep aıta almaımyz. Bizdiń jastarymyz sózsiz daryndy. Solaı bolǵannan keıin sheteldikter bilikti mamandarymyzdy birden ózine tartyp alady. Sondyqtan, Strategııalyq josparda biz jumys ornyn qurý baǵytynda jumys júrgizýimiz kerek. Nelikten? Sebebi, bul baǵytta jumysty toqtatyp qoısaq, biz bilikti jastardyń ornyn sıpap qalamyz», - deıdi Qanat Baıǵarın.
