QazUÝ jýrnalıstıka fakýltetiniń dekany taǵaıyndaldy
ALMATY. KAZINFORM — Jýrnalıst-pedagog Qanat Áýesbaı ál-Farabı atyndaǵy Qazaq ulttyq ýnıversıteti jýrnalıstıka fakýltetiniń dekany bolyp taǵaıyndaldy. Bul týraly JOO baspasóz qyzmeti málim etti.
Jýrnalıst-pedagog Qanat Áýesbaı ál-Farabı atyndaǵy Qazaq Ulttyq ýnıversıtetiniń jýrnalıstıka fakýlteti dekany bolyp taǵaıyndaldy. Q. Áýesbaı - medıa sarapshy, fılologııa ǵylymdarynyń kandıdaty (10.01.10 – jýrnalıstıka). 2004 jyly ál-Farabı atyndaǵy Qazaq ulttyq ýnıversıtetiniń jýrnalıstıka fakýltetin «halyqaralyq jýrnalıstıka» mamandyǵy boıynsha úzdik dıplommen bitirip, aspırantýrasynyń kúndizgi bólimin támamdaǵan. 2010 jyly «Qazaq telearnalaryndaǵy qazirgi aqparattyq baǵdarlamalar tabıǵaty» taqyrybynda kandıdattyq dıssertatsııa qorǵady. «Bolashaq» halyqaralyq stıpendııasy aıasynda Ulybrıtanııada ǵylymı-pedagogıkalyq taǵylymdamadan ótti (University of East Anglia, Norwich). Qazaq ekonomıka, qarjy jáne halyqaralyq saýda ýnıversıtetin «ekonomıka jáne bıznes bakalavry» mamandyǵy boıynsha aıaqtaǵan. «Turan-Astana» ýnıversıtetinde «quqyq magıstri» akademııalyq dárejesin alǵan.
Q.Áýesbaı jýrnalıstik kásibin ǵylymı-pedagogıkalyq qyzmetpen ushtastyryp keledi. Ál-Farabı at. QazUÝ (2004-2009 jj.), L.Gýmılev at. EUÝ (2011-2019 jj.), H. Dosmuhameduly atyndaǵy Atyraý ýnıversıteti (2019-2024 jj.) sııaqty joǵary oqý oryndarynda oqytýshy, aǵa oqytýshy, dotsent, S.Ótebaev atyndaǵy Atyraý munaı jáne gaz ýnıversıtetinde jastar isi jáne áleýmettik máseleler jónindegi prorektorlyq qyzmet atqardy. Medıa salasyn zerttegen kóptegen ǵylymı maqala avtory, onyń ishinde Scopus ǵylymı dereknamasyna engen maqalalary bar. L.Gýmılev at. EUÝ jýrnalıstıka jáne saıasattaný fakýltetinde memlekettik attestattaý komıssııasy (MAK) tóraǵasy, dıssertatsııalyq keńes múshesi, aqparat salasyndaǵy respýblıkalyq oqý-ádistemelik keńes (OÁK ROÁK) múshesi boldy. Ońtústik Koreıada ótken Álemdik Jýrnalıster Konferentsııasynda (World Journalists Conference) Qazaqstan atynan delegat jáne baıandamashy bolǵan.
BAQ jáne úkimettik emes uıymdarda baı tájirıbesi bar: «31 arna», «Qazaqstan», «Astana» sııaqty respýblıkalyq arnalarda tilshi, redaktor-sarapshy, telejúrgizýshi, shef-redaktor, Jalpyulttyq qozǵalystyń medıa-dırektory, Prezıdent ortalyǵy baspasóz qyzmetiniń aǵa sarapshysy, «Qazaqstan» respýblıkalyq teleradıokorporatsııasy» AQ Atyraý oblystyq fılıaly dırektory, «Elorda Aqparat» medıa-holdınginiń dırektor orynbasary, halyqaralyq «Qazaq tili» qoǵamynyń astanalyq fılıaly tóraǵasy, «Qazaqstan» teleradıokorporatsııasynyń dıdjıtal dırektory bolyp qyzmet etti.
Q. Áýesbaı QR Bilim jáne ǵylym mınıstrliginiń, Aqparat jáne qoǵamdyq damý mınıstrliginiń Qurmet gramotalarymen, ýnıversıtet damýyna qosqan úlesi úshin «Ál-Farabı atyndaǵy Kazaq Ulttyq ýnıversıtetine 80 jyl» mereıtoılyq medalimen, QR Aqparat jáne kommýnıkatsııalar mınıstrliginiń «Aqparat salasynyń úzdigi», QR Mádenıet jáne sport mınıstrliginiń «Mádenıet salasynyń úzdigi», QR Ǵylym jáne joǵary bilim mınıstrliginiń «Ǵylymdy damytýǵa qosqan úlesi úshin» tósbelgilerimen marapattalǵan. Qazaqstan jýrnalıster Odaǵy syılyǵynyń laýreaty. Bas redaktorlar Klýbynyń múshesi, «Bolashaq» halyqaralyq stıpendııasy stıpendıattarynyń Keńes múshesi, Qazaqstan Pedagogıkalyq Ǵylymdar Akademııasynyń korrespondent-múshesi.
