Qanat Áljapparov Amanjol Áltaevtyń synyna jaýap berdi
ASTANA. QazAqparat - Jaqynda ǵana ótken «Juldyzdy aıtysty» synǵa alǵandar az emes. Synǵa ilikkenderdiń basynda ázilkesh Qanat tur, dep jazady Baistars.kz.
Esterińizde bolsa, osyǵan deıin Fasebook qoldanýshysy Talǵat Janysbaı Qanattyń ónerine qatysty narazylyǵyn bildirse, aıtys aqyny Amanjol Áltaev Facebook paraqshasynda Qanattan kıeli ónerdiń qutyn qashyrmaýyn surady. «Qanat baýyrym, boıyńda azamattyq namysyń bolsa, ulttyq ónerge degen qurmetiń bolsa, endi aıtys saxnasyna shyqpaýyńdy suraımyn. Aıtys óneri erikkenniń ermegi emes, ónerdi olaı qorlaýǵa bolmaıdy... Qazaqtyń balasy bolsań endi qoı, aqylyń jetse keshirim surasań da artyq emes. Tóreǵalı, Erkin, Roza sekildi aqyndyq talanty bar óner ıeleriniń aıtysqa shyqqanyn qoldaımyn, jyly qabyldaımyn. Janar, Ulyqpan sekildi aıtystan aýyly alys ánshilerge aqylǵa kelińizder demekpin. Kıeli ónerdiń qutyn qashyrmaıyq!» - dep jazdy aıtysker aqyn.
Buǵan jaýap bergen Q.Áljapparov: «Men bul aıtysta ózime berilgen tapsyrmany oryndap shyqtym. Jáne shoý aıtystyń basy-qasynda Júrsin Erman aǵa ózi júrgennen keıin qatysqan bolatynmyn. Amanjol aǵa tarapynan aıtylǵan syn-pikirlerdi durys qabyldaımyn. Mindetti túrde odan nátıje shyǵarýǵa tyrysamyn» - dedi.
