Kanar araldaryndaǵy órt: 3 myńnan astam adam evakýatsııalandy
TENERIFE. QazAqparat – Beısenbide órt sóndirýshiler Ispanııanyń Tenerıfe aralyndaǵy ulttyq saıabaqta ystyq, qurǵaq aýa raıynda shyqqan orman órtin toqtatý úshin kúresti. Kúni boıy 3000-nan astam adam evakýatsııalandy. Tenerıfedegi órt sońǵy 40 jyldaǵy Kanar araldaryndaǵy eń kúrdeli órt bolyp otyr, dep habarlaıdy QazAqparat Reuters-ke silteme jasap.
Aralda demalys kúnderi aýa temperatýrasy kóterilýi múmkin. Jel baǵytynyń ózgerýine baılanysty órt senbi kúni tańerteń soltústik-shyǵystan Tenerıfeniń batysyna qaraı jyljýy múmkin.
Araldyń apattyq-qutqarý qyzmetiniń jetekshisi Pedro Martınestiń aıtýynsha, órttiń taralýy baıaýlaǵan. Túni boıy 200-ge jýyq órt sóndirýshi jumys isteıdi.
«Kóshege shyqqanda tunshyǵa bastaısyz. Tamaǵyńyzǵa birdeńe turyp qalǵandaı», - dedi La-Esperansa aýylynyń turǵyny 37 jastaǵy Alba Hıl.
Bılik jergilikti turǵyndardy úıden shyqpaýǵa shaqyrdy.
Sársenbide bastalǵan órt kem degende 3273 gektar jerdi sharpydy.
Osy jazda aptap ystyq pen qurǵaq aýa raıy Eýropa men Kanadanyń batysynda qatty orman órtterin tutandyrdy. Gavaııdegi Maýı araly da kem degende 106 adamnyń ómirin qıǵan orman órtinen zardap shekti, ondaǵan myń adam evakýatsııalanýǵa májbúr boldy jáne tarıhı Lahaına kýrorttyq qalasy joıyldy.
Ǵalymdardyń aıtýynsha, munyń bári klımattyń ózgerýinen bolyp jatyr.
Órtti sóndirýge 17 ushaq, 350 órt sóndirýshi men áskerı qyzmetshi tartyldy.
Eki Tenerıfe áýejaıy qalypty jumys istep jatyr.
