Kanar araldary mańyndaǵy sýda 300 mıgrant iz-túzsiz joǵalyp ketti
MADRID. QazAqparat – Senegaldan Ispanııanyń Kanar araldaryna úsh qaıyqpen bara jatqan 300-deı mıgrant iz-túzsiz joǵalyp ketti, dep habarlaıdy QazAqparat Reuters agenttigine silteme jasap.
Mıgranttarǵa kómek kórsetetin Walking Borders tobynyń aqparaty boıynsha, bireýinde 65-ke jýyq adam, al ekinshisinde 50-60 adam shamasynda bolǵan eki qaıyq Senegaldan shyqqannan keıin 15 kún ishinde iz-túzsiz joǵalyp ketti.
Úshinshi keme Senegaldan 27 maýsymda shyqqan, bortynda 200-ge jýyq adam bolǵan.
Walking Borders habarlaýynsha, borttaǵy adamdardyń otbasy olar shyǵyp ketkennen keıin eshqandaı hat-habar almaǵan.
Úsh qaıyq ta Kanar araldarynyń biri – Tenerıf aralynan 1700 shaqyrym jerdegi, Senegaldyń ońtústigindegi Kafontınadan shyqqan.
Bul jańalyq Eýropada jerorta teńizi mıgranttary eń qorqynyshty keme apatyna ushyraǵany týraly aqparattan keıin birneshe aptadan soń shyqty. Sol ýaqytta Grekııa jaǵalaýynda lyq tola traýler sýǵa batyp ketken, dep habarlady BBC News.
78 adamnyń sýǵa ketkeni rastaldy, biraq BUU 500 adam áli de iz-túzsiz joǵalǵandar qatarynda ekenin habarlady.
Batys Afrıkadan Kanar araldaryna barar jol mıgranttar úshin eń qaýipti jol sanalady. Oǵan mıgranttardyń kúshti aǵysqa tótep bere almaıtyn qarapaıym balyqshylardyń qaıyǵymen júzetini ǵana sebep emes.
BUU-nyń mıgratsııa boıynsha halyqaralyq uıymy byltyr ıspan araldaryna jetpek bolǵan 559 adam teńizde qaıtys bolǵanyn málimdedi. 2021 jyly qaza tapqandar sany 1126 adamǵa jetti.
Ispanııa ishki ister mınıstrligi 2022 jyly Kanar araldaryna 15 682 adam zańsyz kelgenin anyqtady, bul 2021 jylmen salystyrǵanda 30%-ke az.
