Kanadanyń shyǵysy sý tasqyny astynda qalýda
ASTANA. QazAqparat - Shyǵys Kanadadaǵy Nıý-Bransýık provıntsııasynyń Pert-Endover qalasynyń 200-ge jýyq turǵyny senbiden jeksenbige qaraǵan túni jergilikti ózen sýlarynyń tası bastaýynan qaýipsiz jerge shyǵaryldy, dep habarlaıdy TASS.
"Adamdar qatty úreılenýde. Ótken jyly da sý tasqyny bolǵan edi, bıyl biraq jaǵdaı odan kúrdelirek", - dedi qala meri Terrı Rıtchı. Ol eldi mekende tótenshe jaǵdaı jarııalanǵanyn aıtty.
Qaýipsiz jerge jetkizilgen qala halqy Qyzyl krestiń arnaıy turǵynjaılary men qonaqúılerge, mektepterge ornalastyryldy. Adamdar óz úılerine bir táýlikten kem emes ýaqyttan soń ǵana orala alady degen tujyrym jasalyp otyr.
Aıta keteıik, Pert-Endoverde shamamen 1,8 myń adam turady.
