Kanadalyqtar Qazaqstanda keń jolaqty ınternettiń damýyna joǵary baǵa berdi
Kezdesýde Qazaqstannyń ınnovatsııalyq ekojúıesiniń qazirgi jaı-kúıi men damýy, Kanadalyq ІT kompanııalarynyń Astana Hub Halyqaralyq tehnoparkimen ózara yqpaldastyǵynyń áleýeti, otandyq startap jobalaryn damytýǵa venchýrlyq ınvestıtsııalardy tartý boıynsha yntymaqtastyq ornatý máseleleri talqylandy.
Kanada delegatsııasynyń múshelerin qabyldaǵan Asqar Jumaǵalıev búginde elimizde ár azamattyq ómir súrý sapasyn jaqsartý men ekonomıkany damytýǵa tsıfrlyq tehnologııalar arqyly qol jetkizýge baǵyttalǵan «Tsıfrlyq Qazaqstan» memlekettik baǵdarlamasyna basa nazar aýdarylyp otyrǵanyn tilge tıek etti.
«Osy turǵydan alǵanda, bizdiń eldiń ІT salasyndaǵy ınnovatsııalardy damytý boıynsha álemdik kóshbasshy elderdiń biri sanalatyn Kanadamen yntymaqtas bolýy eki jaqqa da tıimdi bolary shúbásiz. Budan tys, «Astana Hub» bazasynda iske asyrylýy múmkin birlesken jobalar startaptardy damytýǵa ári olardy ishki jáne syrtqy naryqtarǵa shyǵarýǵa jaǵdaı jasaıdy», - dedi mınıstr.
Kanada Úkimetiniń ınnovatsııalyq tehnologııalar jónindegi bas keńesshisi Pıter Van Der Graht Qazaqstandaǵy tsıfrlandyrý úderisiniń jetistikterin jáne ınnovatsııalyq ekojúıeniń damýyn joǵary baǵalady. «Qonaqtardy, ásirese, elimizde keńjolaqty ınternetti engizý qarqyny tańǵaldyrdy. Kanada úkimeti keńesshisiniń pikirinshe, Qazaqstan bul jaǵynan álemniń kóptegen elderinen kósh ilgeri keledi», - dep málimdeıdi mınıstrliktiń baspasóz qyzmeti.
Kezdesý sońynda taraptar ózara dıalog qurýǵa ashyq ári jınaqtalǵan tájirıbeleri men tehnologııalaryn bólisýge ázir ekenin bildirdi.
Avtor: Sara Qabıqyzy