Kanadalyq «Kamekom» Qazatomónerkásippen áriptestikti 30 jylǵa uzartady

ASTANA. QazAqparat - «Qazatomónerkásip» Ulttyq atom kompanııasy men Kameko korporatsııasy iske asyrý týraly kelisimge qol qoıdy. Bul týraly ulttyq atom kompanııasynyń qoǵammen baılanys departamenti habarlady.

Atalǵan kelisim aıasynda kanadalyq «Kameko» korporatsııasy men Qazatomónerkásip álemdik metall naryǵyndaǵy turaqsyzdyqty, Qazaqstan Respýblıkasyndaǵy qolaıly ınvestıtsııalyq ahýaldy eskere otyryp, ekijaqty tıimdi áriptestikti 2045 jylǵa deıin jalǵastyrýǵa nıetti.

Astanada ótip jatqan Sheteldik ınvestorlar keńesi barysynda qol qoıylǵan qujat aldaǵy 30 jylda iske asyrylatyn birlesken jobalardy aıqyndaıdy. Naqty aıtqanda, jer qoınaýyn paıdalaný kelisimi uzartylyp, Qazatomónerkásiptiń «Inkaı» BK» JShS-yndaǵy úlesi 40-tan 60 paıyzǵa deıin artady.

«Qazatomónerkásip» UAK» AQ basqarma tóraǵasy Asqar Jumaǵalıev atap ótkendeı, «Qazatomónerkásip pen Kameko áriptestigi uzaq jyldar boıy ekijaqty tıimdi ári jemisti iskerlik qatynas ornatýdyń úlgisine aınaldy. Sol sebepti biz áriptestigimizdi qazirgi ekonomıkalyq múddelerdi eskere otyryp jalǵastyrýǵa nıettimiz».

«Bul kelisim bizdiń Qazatomónerkásippen áriptestigimizdi nyǵaıtyp, Inkaı kásiporynynyń ınvestıtsııalyq áleýetin tolyq paıdalanýǵa múmkindik beredi» - deıdi Kameko prezıdenti Tım Gıttsel. - Qujat «Kameko» kompanııasyna shyǵyny az óndiris qurý boıynsha strategııany iske asyrýǵa kómektesedi. Bul óz aldyna qazirgi ýran naryǵyndaǵy konıýnktýra táýekelderin azaıtyp, bizdiń pozıtsııamyzdy nyǵaıtýǵa septigin tıgizedi».

Sondaı-aq, atalǵan kelisim sheńberinde birlesken affınajdy óndiris qurý sharttary bekitilgen. Naqty aıtqanda, Kameko kompanııasy Qazatomónerkásipke affınaj jáne konversııa boıynsha óz tehnologııasyn óteýsiz paıdalanýǵa berýge daıyn. Sonymen qatar, eki tarap affınajdy zaýyt qurylysyn bastaý týraly sheshim, tehnıkalyq-ekonomıkalyq negizdeme jasalyp bolǵan soń qabyldanady degen ortaq mámilege keldi.

Eske sala ketsek, «Kameko» álemdegi eń iri ýran óndirýshi kompanııalardyń biri, óndiris úlesi shamamen 16 % quraıdy. Bas keńsesi Saskachevan provıntsııasyndaǵy Saskatýn qalasynda (Kanada) ornalasqan. Qazaqstanda Kamekonyń Qazatomónerkásippen birlesip qurǵan «Inkaı» birikken kásiporyny jumys júrgizedi.