Kanadalyq azamat utyp alǵan 40 mln. dollaryn qaıyrymdylyqqa berýge sheshim qabyldady

Western Canada Lottery lotereıasynan qomaqty aqsha utyp alǵan kanadalyq zeınetker óz týystarynyń úmitin aqtamady. Atap aıtqanda, 65 jastaǵy Tom Krıst 40 mıllıon kanada dollaryn qaıyrymdylyqqa berýge sheshim qabyldady, dep habarlaıdy Associated Press.

Ómir boıy ózin jáne otbasyn qamtamasyz etýge jetkilikti tabys tapqanyn aıta kelip, "maǵan shyn máninde bul aqshanyń qajeti joq", - dedi Krıst. Zeınetke shyqqanǵa deıin ol elektr taýarlaryn satýmen aınalysatyn fırmany basqarǵan.

Kanadalyq azamatqa utysy týraly telefon arqyly golf oınap jatqan kezinde habarlaǵan. Bastapqyda aıaq astynan mıllıoner bolyp shyǵa kelgen Krıst týystaryna aqsha týraly aıtpaǵan jáne lotereıany uıymdastyrýshylarǵa da birden kele qoımaǵan.

Aqyr aıaǵynda Tom Krıst bárinen buryn bul aqshany qaıyrymdylyqqa bergen durys dep sheshken. Onyń sózine qaraǵanda, ol eki jyl buryn qaterli isikten kóz jumǵan áıelin osylaısha eske alǵan.