Kanadalyq JOO-lar Jezqazǵanda jańa tehnıkalyq ýnıversıtet ashýǵa kómektesedi
ASTANA. KAZINFORM – QR Ǵylym jáne joǵary bilim mınıstri Saıasat Nurbek Jezqazǵanda ashylatyn jańa tehnıkalyq ýnıversıtettiń basty baǵyttary týraly aıtyp berdi.
«Jańadan qurylǵan Ulytaý óńirinde halyqaralyq standarttarǵa saı jańa tehnıkalyq ýnıversıtet ashý josparlanǵan. Qazirgi tańda Úkimet qaýlysy shyqty, 90 mln teńge bólindi, arnaıy jumys toby qurylyp, kanadalyq ýnıversıtettermen oqý baǵdarlamalary men pánderi pysyqtalýda. Ákimdik tarapynan jer bólindi», - dedi S. Nurbek Ortalyq kommýnıkatsııalar qyzmetinde.
Mınıstrdiń aıtýynsha, jańa bilim ordasyndaǵy úsh negizgi baǵyt – metallýrgııa, kompıýterlik ınjenerııa jáne qorshaǵan ortamen baılanysty mamandyqtar bolmaq. Degenmen naqty sheshimdi jumys toby qabyldaıdy.
«Halyqaralyq jańa ýnıversıtetti nólden qurý ońaı emes, bul ýaqytty talap etedi. Qazir ınjenerlik jelilerdiń júrgizilýin kútip otyrmyz. Bul jóninde ár jarty jyl saıyn esep berip otyramyz. Kelesi 2025 jyly daıyndyq baǵdarlamalary oqytyla bastaıdy. Nege deseńiz, kanadalyq seriktester qoıatyn eń úlken talap – til bilý. Sondyqtan kelesi jyly daıyndyq kýrstaryna talapker qabyldaý josparlanǵan», - dedi Ǵylym mınıstri.
Eske sala ketsek, elimizde 2021 jyldan bastap álemdik joǵary oqý oryndarynyń 14 fılıaly jumys isteýde. Jaqyn aralyqta taǵy 8 sheteldik JOO fılıaly ashylady.
