Kanadadan tabylǵan Qyzyl Tý ordeniniń ıesin Qazaqstannan izdep jatyr

PAVLODAR. QazAqparat – Pavlodarlyq «Maıdan joly» jasaǵy Ekinshi dúnıejúzi soǵysyna qatysyp, keıinnen Ońtústik Qazaqstan oblysynda qyzmet atqarǵan maıdangerdiń Qyzyl Tý ordeniniń Kanadada satylǵany týraly aqparat aldy, dep habarlaıdy QazAqparat.

«Maıdan joly» izdeý jasaǵyna «191-shi atqyshtar dıvızııasynyń qaıta qurastyrýshylar rotasy» qoǵamdyq uıymy habarlasqan. Olar Uly Otan soǵysyna qatysýshylar nagradtalǵan jaýyngerlik medaldar men ordenderdiń Kanadada satyp alynǵanyn jetkizgen. Endi olardy ıesine qaıta tabystaý úshin ardagerlerdiń týystaryn izdep tabýǵa kómek suraǵan», - dep habarlady tilshilerge «Maıdan joly» izdeý jasaǵynyń komandıri Aleksandr Shıtov.

Onyń aıtýynsha, marapattardyń biri – 1903 jyly dúnıege kelgen Bocharov Ivan Fedorovıchke tıesili Qyzyl Tý ordeni.

Ol Stalıngrad oblysynyń Ýrıýpınsk qalasynda týyp-ósken, Stalıngradta soǵysqan.

«Soǵystan keıin ol Ońtústik Qazaqstan oblysynyń Sháýildir aýylynda aýdandyq áskerı komıssar bolyp qyzmet etti. Sondyqtan Qazaqstanda týystary turýy múmkin. Janashyr jandardan maıdangerdiń týystaryn izdeýge kómek berýin suraımyz, biz ordendi otbasyna qaıtarǵymyz keledi», - dep habarlady jasaqtan.

Soǵysqa qatysýshynyń Qazaqstanda turatyn týystarymen barlyq máseleler boıynsha baılanysý úshin myna mekenjaıǵa habarlasýǵa bolady: Pavlodardaǵy «Maıdan joly» izdeý-zertteý bólimi, tel. [phone]; E-mail: [e-mail].

Sýretterdi A.Shıtov usynǵan.