Kanadadan izdeýde júrgen natsıstik qylmysker tabyldy
ASTANA. 28 sáýir. QazAqparat - Búkil álemnen natsıstik qylmyskerlerdi izdeýmen aınalysatyn Sımon Vızental ortalyǵy tizimdegi tórtinshi kúdikti búgingi tańda Kanadada turyp jatqanyn málimdedi, dep habarlady ITAR-TASS.
Natsıstik qylmysker bolýy múmkin dep topshylanǵan adam 91 jastaǵy bal arasyn ósirýshi Vladımır Katrıýk bolyp shyqty. Bneı-Brıt evreı qoǵamdyq uıymynyń kanadalyq fılıaly ókimetke Katrıýkti Kanada azamattyǵynan aıyrý týraly shaǵym túsirdi, dep habarlady Lenta.rý The Canadian Press basylymyna silteme jasap. Vızental ortalyǵynyń quqyq qorǵaýshylary ony Eýropaǵa estradatsııalaýdy talap etýde, onda ol sotqa tartylýy múmkin.
Vızental ortalyǵynyń málimetinshe, Katrıýk Ekinshi dúnıejúzilik soǵys kezinde Belarýs aýmaǵynda áreket etken ýkraındyq 118-shi kúzet polıtseı batalonynda qyzmet etken.
Lýndtaǵy (Shvetsııa) ýnıversıtettiń tarıhshysy Per Anders Rýdlıngtiń júrgizgen jańa zertteýlerine sáıkes Katrıýk partızandarǵa kómek kórsetken belarýstyń Hatyn derevnıasynyń turǵyndaryn óltirýge belsene qatysqan.
1943 jyly derevnıanyń barlyq turǵyndaryn saraıǵa qýyp tyǵyp, órtep jibergen. Kýágerlerdiń biriniń aıtýynsha, ottan qutylý úshin saraıdan qashpaq bolǵandardy Katrıýk atyp óltirgen.
Katrıýk 1951 jyly Kanadaǵa emıgratsııaǵa kelgen. Azamattyq alý kezinde ol natsıstermen eshqandaı baılanysy joq ekendigin málimdegen. Alaıda jergilikti ókimet oryndary onyń natsıstermen baılanysyn sezip qalyp, kanadalyq azamattyqtan aıyrǵan. 2007 jyly mamyrda dálelderdiń jetkiliksizdiginen sheshim qaıta qaralyp, 2010 jylǵy qarashada oǵan kanadalyq azamattyq qaıtarylǵanyn federaldyq apelıatsııalyq sot qýattaǵan.
Qazir Katrıýk áıelimen birge Monrealdan birneshe saǵat qashyqtyqtaǵy Ormstaýn eldi mekeninde óziniń jeke menshik shaǵyn fermasynda turady. Ol 1959 jyldan beri óz omartasynyń balyn satýmen tabys tabady.
Buryn Katrıýk natsıstik qylmystarǵa eshqandaı qatysy joq ekenin aıtyp, azar da bezer bolǵan, al qazir ol jańa tarıhı zertteýlerge túsinik berýden basyn alyp qashyp otyr.
