Kanadadaǵy ushaq apatynda eldiń burynǵy kólik mınıstri qaza tapty
ASTANA. QazAqparat - 29 naýryz kúni Kıeli Lavrentıı shyǵanaǵynda bolǵan áýe apatynda Kanadanyń burynǵy kólik mınıstri Jan Laper qaza tapty. Bul týraly CBC News-qa siltememen Lenta.ru habarlaıdy.
Naqtylanǵan málimetter boıynsha, ushaqtyń qulaýy saldarynan jeti adam, sonyń ishinde Laperdiń zaıyby jáne otbasynyń basqa músheleri opat boldy.
Sent-ıÝberden ushqan áýe kemesi túske qaraı, Avr Oks Mezon aralyndaǵy aerodromǵa jaqyndaǵan kezde qulady. Sol kezde tuman bolyp, jańbyr quıyp turǵan. Áýe kemesi áýejaıǵa birneshe kılometr qalǵanda qulaǵan.
El bıliginiń málimetterinshe, Mitsubishi MU-2B-60 ushaǵy AQSh-tyń jeke menshiginde bolyp, sonda tirkelgen.
