Kanadadaǵy mekteptegi atys: kúdiktiniń úıinen anasy men 11 jastaǵy týysynyń máıiti tabyldy
ASTANA. KAZINFORM - Kanadanyń Tambler-Rıdj qalasyndaǵy mektepte atys uıymdastyrǵan kúdiktiniń anasy men 11 jastaǵy týysynyń denesi oqý ornyna jaqyn ornalasqan úıden tabyldy. Bul týraly CBC habarlady.
18 jastaǵy Djessı Van Rýtselaar aldymen úı ishinde oq atqan, keıin mektepke baryp, sol jerde alty adamdy óltirgen. Oqıǵa sońynda ol ózine qol calǵan.
Jalpy sany toǵyz adam qaza tapty, taǵy 25 adam jaraqat aldy. Tambler-Rıdj orta mektebinde alty adam kóz jumdy: 39 jastaǵy muǵalim, 12 jastaǵy úsh qyz jáne 12 men 13 jastaǵy eki ul. Mert bolǵandardyń biri baspaldaqtan tabylsa, qalǵandary mektep kitaphanasynda bolǵan.
Keıin kórshi úıden taǵy eki adamnyń – 39 jastaǵy anasynyń jáne 11 jastaǵy baýyrynyń (jynysy naqtylanbaǵan) máıiti anyqtaldy. Deneler kúnniń ekinshi jartysynda tabylǵan. Polıtsııany kúdiktiniń kórshisi shaqyrǵan. Oǵan Djessı Van Rýtselaardyń týysy kómek surap júgingen.
Kanadanyń Koroldik atty polıtsııasy komıssarynyń orynbasary Dýeın Makdonaldtyń málimetinshe, áýeli atys úıde bolǵan, sodan keıin kúdikti mektepke bet alǵan.
Makdonald sondaı-aq Van Rýtselaardyń bıologııalyq turǵyda er adam bolyp týǵanyn, alaıda shamamen alty jyl buryn genderlik aýysý úderisin bastaǵanyn aıtty.
Sońǵy jyldary polıtsııa kúdiktiniń úıine birneshe ret shaqyrtý boıynsha barǵan. Keıbir jaǵdaılar psıhıkalyq densaýlyq máselelerine baılanysty bolǵan. Van Rýtselaarda qarý saqtaýǵa ruqsat bolǵanymen, onyń merzimi 2024 jyly aıaqtalǵan. Tórt jyl buryn ol dál osy mekteptegi oqýyn tastaǵan.
Seısenbi kúni polıtsııaǵa atys týraly habar túsken. Kezekshi jasaq oqıǵa ornyna eki mınýt ishinde jetip, atys dybysyn estigen soń ǵımaratqa kirgen. Birneshe mınýttan keıin kúdikti tabyldy — ol ózin atyp óltirgen.
Oqıǵa ornynan eki qarý tabyldy: bir uzyn uńǵyly myltyq jáne bir ózgertilgen tapansha. Qaı qarýdyń qoldanylǵany ázirge naqtylanbady. Qarýlardyń eshqaısysy Van Rýtselaardyń atyna tirkelmegen.
Tambler-Rıdjde shamamen 2400 adam turady. Orta mektepte 7–12 synyptarda 160 oqýshy bilim alady.
Qylmystyń naqty sebebi áli anyqtalǵan joq. Polıtsııa basqa kúdiktiler bar degen nusqany qarastyrmaı otyr.
Osyǵan deıin Kanadada mektepte atys bolyp, on adam qaza tapqany týraly jazdyq.
