Kanadada júz myńdaǵan tutynýshy muzdy jaýyn saldarynan jaryqsyz qaldy
Qolaısyz kún raıynan Kvebek jáne Ontarıo provıntsııalary elektr qýatynan aıryldy. Hydro-Québec veb-saıtynyń aqparaty boıynsha, Kvebekte sársenbi kúni keshke jergilikti elektr jelilerin paıdalanatyn 780 myńǵa jýyq klıent jaryqsyz qaldy. Olardyń kópshiligi Monrealda, sonymen qatar provıntsııanyń ońtústik-batysyndaǵy Monterejı jáne Ýtaýe óńirlerinde turady. Hydro-Québec-tiń 4,5 mln klıentiniń shamamen 17%-ynda jaryq sóngen.
«Jaryqtyń óshýine jaýyn-shashyn men jel sebep boldy», - dep málimdedi Hydro-Québec ókili Gabrıel Leblan. Onyń sózinshe, jel aǵashtardy qulatqan, al olar elektr taratatyn jelilerge zaqym keltirýi múmkin.
Kanadalyqtar synǵan butaq pen qulaǵan aǵashtar, muz qaptaǵan avtokólikter men elektr jelileri jáne basqa da ınfraqurylymdy basyp qalǵan aýyr muzdardyń sýreti men vıdeosyn áleýmettik jelilerde kóptep jarııalady.
Tabıǵattyń bul qubylysy kóp adamnyń esine 1998 jylǵy muzdy daýyldy túsirdi. Ol kezde Kvebektiń mıllıondaǵan turǵyny daǵdarys ýaqytynda elektr energııasynsyz qalyp, 30 adam sýyqtan, ýly gazdan jáne daýylǵa baılanysty basqa da sebepten qaıtys bolǵan.
Al, Ontarıoda 120 myńnan astam Hydro One klıenti sársenbi keshke jaryqsyz qaldy. Jergilikti elektr qýatyn jetkizýshi iri kompanııa qyzmetkerleriniń múmkindiginshe jaǵdaıdy jyldam ári qaýipsiz túrde qalpyna keltirýge tyrysyp jatqanyn aıtty.
Kanadanyń Qorshaǵan orta jáne klımattyń ózgerisi mınıstrligi Ontarıo, Kvebek, Jańa Shotlandııa men Nıý-Bransýıktiń keı bólikterinde muzdy jaýyn jaýýy múmkin ekenin eskertti. Agenttik habarlaýynsha, Torontoda 60 mıllımetrge deıin jańbyr jaýýy múmkin, al Ontarıodaǵy Vındzor men Gamıltonda kólemi bes tsenttik monetamen birdeı burshaq jaýyp, jyldamdyǵy saǵatyna 90 shaqyrym bolatyn jel turýy múmkin.