Kanadada júk kóligi bir top jaıaý júrginshini qaǵyp ketti: qaza bolǵandar bar
OTTAVA. QazAqparat – Kanadanyń Kvebek provıntsııasynyń Amkı qalasynda júk kóligi jaıaý júrginshilerdi qaǵyp ketti, eki adam qaza taýyp, toǵyz turǵyn jaraqat aldy, dep habarlaıdy QazAqparat BBC News-qa silteme jasap.
Avtokólik júrgizýshisi 38 jastaǵy jergilikti turǵyn bolyp shyqty, ol ustaldy.
Tergeýshiler «oqıǵa aldyn ala josparlanǵan shabýyl boldy ma?» degen suraqqa jaýap izdep jatyr.
Qaza tapqandar – 70 jáne 60 jastaǵy eki er adam. Kanadalyq BAQ habarlaýynsha, zardap shekkender qatarynda balalar da bar. Olar jergilikti aýrýhanada jatyr.
Kýá bolǵandardyń biriniń sózinshe, júk kóligi trotýarda júrgen jaıaý adamdarǵa jaqyndaǵan saıyn jyldamdyǵyn arttyrǵan.
Bul jaǵdaı Monrealda avtobýs balabaqsha ǵımaratyna soǵylyp, eki bala kóz jumǵan oqıǵadan keıin bir aıdan soń bolyp otyr.
