Kanadada jastar komandasynyń 14 hokkeıshisi kólik apatynan mert boldy
ASTANA.QazAqparat - Kanadada «Gýmbold Bronkos» hokkeı komandasy mingen avtobýs Saskachevan provıntsııasynyń mańynda júk kóligimen soqtyǵysyp qaldy, dep habarlaıdy «QazAqparat» HAA BBC-ge silteme jasap.
16-21 jastaǵy sportshylar mingen avtobýsta 14 adam qaza tapqanyn jergilikti polıtsııa rastap otyr. Kólikte barlyǵy 28 adam bolǵan. Jol apatynan mert bolǵandardyń ishinde avtobýs júrgizýshisi de bar.
Polıtsııa ınspektory Ted Mýnronyń málimetinshe, qutqarý jumystary áli jalǵasýda. Nıpavın qalasynyń shirkeýinde zardap shekkenderdiń otbasylaryna qoldaý kórsetý ortalyǵy qurylǵan.
"Gýmboldt Bronkos" hokkeı klýbynyń prezıdenti Kevın Gerındjer klýbtyń resmı saıtynda qaza tapqandardyń jaqyndaryna kóńil aıtty.
