Kanadada jasóspirim eki polıtseıdi atyp óltirdi
OTTAVA. QazAqparat - Polıtsııanyń eki qyzmetkeri otbasylyq janjal kezinde oqqa ushty, dep habarlaıdy QazAqparat BBC News arnasyna silteme jasap.
Edmonton qalasy polıtsııasynyń habarlaýynsha, adam ólimine ákelgen atysqa kúdikti jasóspirim nebári 16 jasta.
Polıtsııa sonymen qatar jasóspirimniń óz-ózine oq atyp qaıtys bolǵanyn aıtty.
Onyń 55 jastaǵy anasyna da oq tıip, ol aýyr halde aýrýhanaǵa jetkizildi.
Qaza tapqan ofıtserler - 35 jastaǵy Trevıs Djordan men 30 jastaǵy Brett Raıan. Olar Edmonton qalalyq polıtsııa qyzmetinde jumys istegen.
Jergilikti polıtsııa basshysy Deıl MakFıdiń aıtýynsha, ofıtserlerge beısenbi kúni jergilikti ýaqyt boıynsha saǵat 00:47 shamasynda Edmonton turǵyn úı keshenine shaqyrtý boıynsha jetken kezde oq atylǵan.
Polıtsııanyń málimetinshe, kúdiktiniń anasy telefon shalyp, úıinde jábir kórip jatqanyn aıtty. Polıtsııa qyzmetkerleri ony ǵımarattyń janynan kútip aldy. Páterge jaqyndaı bergende, polıtsııa qyzmetkerlerine esik aldynda jas kúdikti birneshe ret oq atqan.
Oq atqan jasóspirim buryn sottalmaǵan, deıi polıtsııadan. Atys kezinde qarýdyń qandaı túri qoldanylǵany aıtylmaıdy. Qazir polıtsııa onyń qaıdan shyqqanyn anyqtap jatyr.
Kanadada sońǵy jarty jylda segiz polıtsııa qyzmetkeri qyzmettik mindetin atqarý kezinde qaza tapty.
