Kanadada Jambyl Jabaevtyń 175 jyldyǵy atap ótildi

OTTAVA. QazAqparat – Qazaqtyń uly aqyny Jambyl Jabaevtyń 175 jyldyǵyna oraı Qazaqstannyń Kanadadaǵy Elshiligi Qazaqstan Respýblıkasy táýelsizdiginiń 30 jyldyǵyn Kanadada atap ótý baǵdarlamasy aıasynda arnaıy mýzykalyq onlaın kesh uıymdastyrdy. Bul týraly QazAqparat SІM silteme jasap habarlaıdy.

Іs-sharaǵa kanadalyq qoǵamdyq toptar, dıplomatııalyq korpýs ókilderi, Ontarıo, Alberta jáne Vankýver provıntsııalaryndaǵy qazaqstandyq dıaspora, sondaı-aq Kanadadaǵy qazaqstandyq stýdentter qatysty.

Keshti Qazaqstan Elshiliginiń Keńesshisi Murat Rústemov ashty. Otandyq dıplomattyń aıtýynsha, is-sharany Elshilik Kanadadaǵy dostarymen birge Jambyldyń murasyn nasıhattaý maqsatynda ótkizýde. «Bul ásirese qazaqstandyqtardyń ósip kele jatqan urpaǵy, Kanadadaǵy otandastarymyz úshin qazaq mádenıeti olarǵa qol jetimdi jáne túsinikti bolýy úshin qajet», – dedi ol osy oraıda.

Dıplomat, kórnekti sýyryp salma aqyn Jambyl Jabaevtyń shyǵarmashylyq murasy qazaq poezııasynyń altyn qazynasyna jatatynyn atap ótti. Onyń aıtýynsha, aqyn óziniń uzaq jáne jemisti ǵumyryn eń ıgi adamı qasıetterdi – otansúıgishtikti, tektilikti, zańǵa adaldyq pen ádildikti dáripteýge arnady.

Іs-shara barysynda ánshi Álııa Sedekqyzynyń oryndaýynda Jambyldyń áıgili «Ágýgaı» jáne Qyranbek Altannyń oryndaýynda Altynbek Qorazbaev pen Serik Turǵynbekovtyń «Týǵan jerim tamasha» ánderi shyrqaldy.

Jambyldyń «Elimniń qyzdaryna» óleńin Paola Zıgaıtıs jáne Lıýdmıla Kıseleva shabyttanyp oqyp shyqty.

Kórermender Tolqyn Menkesheva, Sultanbek Serik-uly jáne Aqmadııar Nurlybaıulynyń dombyramen oryndaýyndaǵy Qurmanǵazy Saǵyrbaevtyń «Adaı», Ábdimomyn Jeldibaevtyń «Erke sylqym» jáne Nurǵısa Tilendıevtiń «Jekpe jek» kúılerin tyńdaı aldy.

Іs-shara sońynda, Qazaqstannyń Torontodaǵy konsýly Ánýar Ahmetov barlyq atsalysqandarǵa Kanadadaǵy qazaq mádenı murasyn ilgeriletýge belsendi qatysqandary úshin shynaıy rızashylyq bildirdi.