Kanadada úndister temirjol qatynasyn toqtatty
NUR-SULTAN. QazAqparat – Kanadadaǵy barlyq temirjol jolaýshylar tasymaly belgisiz merzimge deıin toqtatyldy. Oǵan baıyrǵy halyqtardyń qarsylyq sharasy sebep boldy, dep habarlaıdy QazAqparat VIA Rail Kanada jolaýshylar poıyzy operatoryna silteme jasap.
Toronto men Ottava, sonymen qatar Monreal arasyndaǵy temirjol qatynasyna ótken beısenbiden beri tıendınaga-mogavk úndis halqynyń ókilderi kedergi keltirip jatyr. Osy arqyly olar Brıtandyq Kolýmbııa provıntsııasyndaǵy jerlerinde qubyrjol salynýyna qarsy shyǵyp jatqan vetsýveten taıpasyna qoldaý kórsetken.
Ontarıo provıntsııasy Belvıl qalasyndaǵy temirjol mańyna lager qurǵan úndis taıpalary eldiń batysy men shyǵysyn baılanystyratyn jalǵyz temirjol qatynasyn toqtatyp tastady. CN temirjol kompanııasynyń vagondardy ornalastyratyn bos orny bolmaǵandyqtan Torontodan shyǵysqa júretin barlyq poıyzdardyń qozǵalysy toqtatyldy. Keleńsiz oqıǵa ekonomıkaǵa úlken shyǵyn ákelýi múmkin. Óıtkeni, kompanııanyń málimeti boıynsha, CN jyl saıyn 250 mlrd dollardan asa taýar tasymaldaıdy.
