Kanadada saýda ortalyǵynyń shatyry opyrylyp qulady: qurbandar bar
ASTANA. 25 maýsym. QazAqparat - Kanadanyń Ontarıo provıntsııasynda ornalasqan Ellıot-Leık shaǵyn qalasynda saýda ortalyǵynyń shatyry opyrylyp qulady, dep habarlady RBK-dan.
Jergilikti polıtsııa kem degende bir adam qaza tapqandyǵyn habarlady. Provıntsııanyń polıtsııa ınspektory Persı Djollımordyń aıtýynsha, oqıǵa ornynda túsirilgen kadrlarda úıindilerdiń arasynda adamnyń qoly men aıaǵy kórinip turdy. 22 adam jaraqat aldy, olardyń tórteýi aýrýhanaǵa jetkizildi.
Qala meri Rık Gamılton tótenshe jaǵdaı jarııalady.
Qazirgi ýaqytta qutqarýshylar úıindilerdi qoparý boıynsha tolyq kólemdi jumysty bastaı almaı otyr, sebebi, ǵımarattyń qalǵan bóliginiń qulaý qaýpi bar.
Úıindiler astynda qansha adamnyń jatqandyǵy týraly málimetter ártúrli. Jergilikti bılik beton astynda kem degende eki adamnyń qalǵany týraly aıtsa, polıtsııa málimetterinshe, toǵyz adamnyń taǵdyry belgisiz.
Órt qaýipsizdigi qyzmetiniń ókilderi betondy plıtalardyń astynan daýystar shyǵyp jatqandyǵyn aıtty.
