Kanadada poıyz ben spırt avtotsısternasy soqtyǵysyp, alapat órt boldy
ASTANA. QazAqparat - Kanadanyń batysynda poıyz ben spırt tasymaldaıtyn júk kóliginiń soqtyǵysýy alapat órtke sebep boldy. Bul jaıly SVS arnasy habarlaıdy.
Oqys oqıǵa keshe Port-Kokıtlam qalasynda, CN kólik kompanııasy deposynyń aýmaǵynda bolǵan. Polıtsııanyń aldyn ala málimetteri boıynsha eshkim zardap shekpegen. Biraq áleýmettik jelide taralǵan vıdeodan avtotsısterna jáne poıyzdyń birneshe vagony órt qushaǵynda qalǵany anyq kórinedi.
CN kompanııasy ókilderi júk poıyzynda ýly hımııalyq zattar bolmaǵanyn málimdedi. Qaýipsizdikti qamtamasyz etý maqsatynda oqıǵa ornynan 1 shaqyrym radıýsta ornalasqan turǵyn úılerdiń turǵyndary qaýipsiz jerge kóshirildi.
