Kanadada polıtsııa kıimin kıgen belgisiz bireý 13 adamdy atyp óltirdi
NUR-SULTAN. QazAqparat – Kanadanyń Jańa Shotlandııa provıntsııasyndaǵy atystan keminde 13 adam mert boldy. Olardyń bireýi polıtsııa qyzmetkeri, dep habarlaıdy bbc.com.
Turǵyndarǵa shabýyldaǵan adamdy atyp óltirdi. Kýágerler onyń polıtsııanyń formasyn kıip, polıtsııanikine uqsaıtyn kólikpen júrgenin aıtady.
Atys senbi kúni Portapık degen shaǵyn qaladan bastalǵan. Polıtsııa shabýyldaýshyny toqtaqpaq bolyp, 12 saǵat boıy arpalysqan. Jergilikti turǵyndarǵa eshqaıda shyqpaý qajettigi týraly eskertilgen.
Baýkespe qolyndaǵy qarýymen Jańa Shotlandııadaǵy birneshe eldi mekende bolǵan. Sondyqtan onyń naqty qansha adamdy óltirgeni ázirge belgisiz.
Jergilikti polıtsııa Twitter arqyly 51 jastaǵy Gebrıel Ýortman atty azamatqa kúdik keltirilip otyrǵanyn habarlady. Ol polıtsııa qyzmetkeri emes, alaıda polıtsııanyń kıimin kıip, polıtsııa qyzmetkerleri minetin kólikke uqsas kólikpen júrgen.
Kanadanyń premeri buny jantúrshigerlik jaǵdaı dep baǵalady. Al Jańa Shotlandııa úkimetiniń basshysy Stıven Maknıl «Bul bizdiń provıntsııanyń tarıhyndaǵy buryn-sońdy bolmaǵan eshqandaı mán-maǵynasy joq zorlyq-zombylyq» degen baǵa berdi.
Kanada polıtsııasynyń basshysy Brenda Lýtskıı qaraqshyny ustaý kezinde tártip saqshylarynyń onymen atysqanyn habarlady.
Soǵan qaramastan bul jaǵdaıǵa ázirge «terrorıstik akti» degen baǵa berilgen joq. Qylmystyq árekettiń mán-jaıy áli naqtylanyp jatyr.
Polıtsııa basshysynyń sózinshe, shabýyldaýshynyń aldymen naqty jospary bolǵan, keıinnen ol beı-bereket áreket ete bastaǵan.
Osyǵan deıin Kanadanyń Jańa Shotlandııa provıntsııasynda belgisiz bireýdiń bir top adamǵa oq jaýdyrǵanyn habarlaǵan bolatynbyz.
