Kanadada Naýryz meıramy saltanatty túrde atalyp ótti
«Meıramǵa baılanysty 400-den astam otandastarymyz, jergilikti isker jáne qoǵamdyq top ókilderi Kanadanyń eń iri megapolısinde bas qosty. Іs-shara barysynda qazaq halqynyń ulttyq taǵamdary usynylyp, balalarǵa arnalǵan oıyndar men tapsyrmalar, sondaı-aq Kanadada turyp jatqan daryndy qazaqstandyqtardyń qatysýymen arnaıy merekelik kontsert uıymdastyryldy», delingen baspasóz baıanynda.
Qazaqstannyń Kanadadaǵy Elshisi Aqylbek Kamaldınov quttyqtaý sózinde Naýryz meıramy ǵasyrlar boıy urpaqtan urpaqqa berilip kele jatqan beıbitshilik pen kelisimniń sımvoly ekenin atap ótti.
«Naýryz bizdiń elimiz úshin úlken mańyzǵa ıe, ol úılesimdilikke, ózara túsinistikke jáne áleýmettik turaqtylyqqa yqpal etedi. Bizdiń basty qundylyǵymyz - halyqtyń birligi. Sondyqtan biz beıbitshilik pen kelisimdi únemi nyǵaıtýǵa tıispiz», - dedi Elshi.
Budan bólek, Elshi A.Kamaldınov qazaqstandyq mádenıetti shetelderde belsendi ilgeriletýdi kózdeıtin «Rýhanı jańǵyrý» baǵdarlamasynyń iske asyrylýyna erekshe nazar aýdardy. Osyǵan baılanysty, ıslam, parsy jáne Ortalyq Azııa órkenıetteriniń biregeı eksponattary men jınaqtamalaryn usynatyn Torontodaǵy Aǵa-Han mýzeıinde Naýryz merekesin toılaý mańyzy óte joǵary oqıǵa ekenine toqtaldy.
Sonymen qatar, saltanatty is-sharanyń teń uıymdastyrýshysy bolyp óz úlesin qosqan Qazaqstannyń Ontarıo provıntsııasyndaǵy Qurmetti konsýly Sten Bartı de barsha qazaqstandyqtardy Ulystyń uly kúnimen quttyqtady. Ol 20 jyldan artyq ýaqyt boıy elimizdiń qarqyndy damýyn qýanyshpen baqylap otyrǵanyn aıtyp, Kanadanyń ortalyq provıntsııasynda Qazaqstannyń atynan jumys jasaý múmkindigine rızashylyǵyn bildirdi.
Meıramnyń júrgizýshisi retinde tanymal kanadalyq jýrnalıst Ben Malronıdiń qatysqany qonaqtar úshin tańǵalarlyq jaıt boldy. Ol «Etalk» jáne «Canadian Idol» baǵdarlamalaryna qatysyp, sondaı-aq «Oskar», «Altyn globýs», «Juno Awards» syılyqtaryn tabys etý rásimderin júrgizý arqyly búkil álemge tanylǵan.
Іs-shara barysynda Qazaqstan Elshisi Torontoda oqyp júrgen qazaqstandyq stýdenttermen de jeke kezdesti. Elshi A.Kamaldınov Elshiliktiń jumystary týraly túsindirip, turaqty túrde baılanysta bolý úshin jáne tótenshe jaǵdaılarda kómek kórsetý úshin konsýldyq esepke turý qajettiligin atap ótti. Jastar, óz kezeginde, ózderiniń oı-pikirleri men usynystarymen bólisip, Elshilikpen yntymaqtasýǵa daıyndyǵyn bildirdi.
