Kanadada munaı óńdeıtin zaýytta jarylys bolýy saldarynan 1400 adam kóshirildi
ASTANA. 7 qazan. QazAqparat - Kanadanyń Redjaına (Saskachevan provıntsııasy) qalasyndaǵy munaı óńdeıtin zaýyttyń aýmaǵynda qýatty jarylys boldy. Kásiporyn aýmaǵynan 1400 qyzymetker kóshirildi.
CBC telekompanııasyna silteme jasap Newsru.com habarlaǵandaı, oqys oqıǵa dızel otyny óndiriletin bólimde bolǵan. Kýágerlerdiń sózine qaraǵanda, órttiń qýatty bolǵany sonshalyq, joǵary temperatýradan metall qurylystar balqı bastaǵan.
Telekompanııanyń deregine qaraǵanda, jańa jabdyq ornatyp jatqan 10 jumysshy zardap shekti. Olardyń segizi aýrýhanaǵa jatqyzylsa, ekeýine oqıǵa ornynda medıtsınalyq kómek kórsetildi, dep habarlady ITAR-TASS.
Aldyn ala málimet boıynsha, qubyrdan gaz shyǵýy jarylys pen órttiń sebebi bolǵan.
