Kanadada mektepte atys bolyp, on adam qaza tapty
ASTANA. KAZINFORM — Brıtandyq Kolýmbııanyń Tambler-Rıdj qalasyndaǵy mektepte bolǵan atys Kanada halqyn kúızeliske ushyratty, dep habarlaıdy Kazinform.
Atys kezinde shabýyl jasaýda kúdikke ilingen áıeldi qosa alǵanda on adam qaza tapty.
Polıtsııanyń málimetinshe, ómirge qaýip tóndirmeıtin jaraqattar alǵan shamamen taǵy 25 adam em alyp jatyr.
ABC jazýynsha, atys Kanadanyń sońǵy tarıhyndaǵy eń joıqyn jappaı zorlyq-zombylyq oqıǵalarynyń biri jáne 2020 jylǵy eldegi eń joıqyn atys boldy.
Atys bolǵan Tambler-Rıdjde shamamen 2400 adam turady. Qala Vankýverden soltústikke qaraı 1000 shaqyrymnan astam jerde ornalasqan.
Kanada premer-mınıstri Mark Karnı áleýmettik jelide bolǵan oqıǵa ony qatty kúızeliske ushyratqanyn jazdy.
— Men búgin Brıtandyq Kolýmbııadaǵy Tambler-Rıdjde bolǵan jan túrshigerlik atys oqıǵalaryna baılanysty qatty kúızeliske tústim. Osy sumdyq zorlyq-zombylyq saldarynan jaqyndarynan aıyrylǵan otbasylar men dostaryna duǵa tilep, shyn júrekten kóńil aıtamyn. Búgin ómiri túbegeıli ózgergen jandarmen birge búkil kanadalyqtar aza tutyp otyr. Sondaı-aq óz azamattaryn qorǵaý úshin ómirin qaterge tikken alǵashqy áreket etýshi qyzmetkerlerdiń batyldyǵy men janqııarlyǵy úshin alǵys bildiremin. Qıyn-qystaý sátte bir jaǵadan bas, bir jeńnen qol shyǵara bilý — elimizdiń eń asyl qasıetteriniń biri. Bul — bizdiń janashyrlyǵymyz, birligimiz jáne bir-birimizge degen qamqorlyǵymyz. Men kóńil aıtý úshin Premer Ebımen, sondaı-aq federaldyq deńgeıdegi sharalardy úılestirip otyrǵan Qoǵamdyq qaýipsizdik mınıstri Garı Anandasangarımen baılanysqa shyqtym. Bizdiń resmı tulǵalar qaýymdastyqqa barynsha qoldaý kórsetý úshin áriptesterimen tyǵyz baılanysta jumys istep jatyr. Kanada Úkimeti osy aýyr qasiretke tap bolǵan Brıtandyq Kolýmbııa turǵyndarymen birge, — dedi ol.
Belgili bolǵandaı, Kanada premer-mınıstri atysqa baılanysty Mıýnhendegi qaýipsizdik konferentsııasyna josparlanǵan saparyn toqtatty.
Buǵan deıin AQSh-tyń Braýn ýnıversıtetindegi atys kezinde eki adam qaza tapqanyn jazdyq.