Kanadada qaza tapqan qazaqstandyqtyń denesin elge jetkizý úshin qarjy jınaý bastaldy
ASTANA. QazAqparat - Vankýverge jaqyn jerdegi taýda bolǵan qaıǵyly oqıǵanyń qurbanyna aınalǵan Qazaqstan azamaty Methat Ábenovtiń denesin jetkizý úshin onyń týystary, dostary men qaıyrymdy jandar qarjy jınaýdy bastady, dep habarlaıdy «QazAqparat» HAA.
Qazirgi tańda osy jaǵdaıǵa baılanysty qurylǵan Gofundme paraqshasynda 10 myń AQSh dollary jınalǵan. «Qymbatty dostar, barlyǵymyz súıikti dosymyz Methat Ábenovtiń taýda bolǵan jazataıym oqıǵanyń saldarynan qaıtys bolǵanyn bilemiz. Bul biz úshin - orny tolmas qaıǵy. Ol óte jaqsy, qamqor adam boldy. Kóptegen adamdar ony saǵynatyn bolady!», - delingen paraqshadaǵy habarlamada.
Qarjy jınaýǵa qatysty boıynsha paraqshany qurýshylardyń sózine qaraǵanda, olar kómekteskisi keletin jandardan hattar men habarlamalar alǵan. Olardyń aıtýynsha, Methattyń saqtandyrýy osy qaıǵyǵa baılanysty shyǵyndardy jappaıdy. Sondyqtan, olar barlyq qaıyrymdy jandardyń Methattyń otbasyna kómektesip, onyń denesi men jerleý rásimine aqsha jınaýdy suraǵan.
Globalnews.ca aqparaty boıynsha, Methattyń denesin jergilikti qutqarýshylar tapqan. 27 jastaǵy qazaqstandyq taýǵa serýendeýge ketip, belgilengen ýaqytta kelmegen. Budan buryn habarlanǵandaı, marqum Brıtan Kolýmbııa ýnıversıtetine óz kúshimen grantqa oqýǵa túsip, Kanadadaǵy SNC Lavalin kompanııasynda jumys istegen.
