Kanadada burynǵy mektep-ınternat aýmaǵynda 751 balanyń qańqasy tabyldy
TORONTO. Anadoly-QazAqparat – Kanadada úndis balalaryna arnalǵan burynǵy mektep-ınternattyń aýmaǵynda 751 balanyń súıeginiń tabylýyna baılanysty, taǵzym etý aktsııasy ótti, dep habarlaıdy QazAqparat Anadoly agenttigine silteme jasap.
Balalardyń qańqasy 24 maýsym kúni Kanadanyń batysyndaǵy Saskachevan provıntsııasynda ornalasqan burynǵy mektep-ınternattyń aýmaǵynda tabylǵan.
Kaýsess okrýginiń jergilikti halqynyń qaýymdastyǵymen uıymdastyrylǵan aktsııa duǵa oqýdan bastaldy. Keıin qaza bolǵan balalardyń rýhyna bir mınýt únsizdik jarııalandy.
Koronavırýs pandemııasyna baılanysty duǵa oqý sharasyna 150 adam qatysty. Olar balalardyń qurmetine 751 balaýyz maıshamyn jaqty.
Kaýsess okrýginiń jergilikti halqy qaýymdastyǵynyń ókili Djonatan Lerattyń sózinshe, provıntsııada alǵash ret balalardyń qańqasy 10 jyl buryn tabylǵan. Sondaı-aq ol qańqalar mektep-ınternattan 10 metr qashyqtyqta tabylǵanyn aıtty.
Kanada koroldiginiń atty polıtsııasynyń málimetinshe, balalardyń súıekteri tabylǵannan keıin kóp uzamaı Brıtan Kolýmbııasy provıntsııasynyń Sımılkamın aýdanynda ornalasqan katolıkterdiń kóne eki shirkeýi tolyǵymen janyp ketken. Olarǵa ot qasaqana qoıyldy degen boljam bar. Shirkeýler Kamplýpstaǵy mektep-ınternattan 200 metr qashyqtyqta ornalasqan. Osy Kamplýpsta órt oqıǵasyna deıin 215 balanyń súıegi tabylǵan.
«Polıtsııa órt oqıǵalaryn kúmándi dep sanaıdy. Sebebi ot qoıý úshin tez janatyn suıyqtyq paıdalanylǵan jáne órt eki shirkeýde bir mezgilde tutanǵan», - delingen saıt aqparatynda.
